Yaxın Şərqdə alovlanan hərbi münaqişə fonunda Vaşinqtonla Körfəz ölkələri arasında olduqca gizli və sensasiyalı bir sövdələşmənin üstü açılıb.
Musavat.com xəbər verir ki, ABŞ-ın nüfuzlu "The Wall Street Journal" (WSJ) nəşrinin yaydığı məlumata görə, Prezident Donald Tramp administrasiyası Birləşmiş Ərəb Əmirliklərinə (BƏƏ) süni intellekt sahəsində ən müasir və qabaqcıl çiplərə birbaşa çıxış imkanı yaradıb. Bu addım BƏƏ-nin İrana qarşı həyata keçirilən hərbi əməliyyatlarda ABŞ ordusuna göstərdiyi gizli hərbi dəstəyin qarşılığında atılıb.
Nəşrin əldə etdiyi gizli məlumatlara əsasən, Əmirliklər İrandakı hərbi hədəflərə zərbələr endirilməsində yaxından iştirak edib və strateji əhəmiyyətli Hörmüz boğazında gəmilərin təhlükəsiz hərəkətinin təmin olunmasına birbaşa logistik köməklik göstərib. Yeni qaydalara əsasən, BƏƏ artıq ikili təyinatlı qabaqcıl texnologiyalara çıxış rejimində Avropa ölkələri, Cənubi Koreya və Hindistanla tamamilə eyni imtiyazlı hüquqlara sahib olacaq.
Lakin bu qərarın ABŞ Konqresində ciddi etirazlar və suallar doğuracağı gözlənilir. Qəzet yazır ki, BƏƏ-nin milli təhlükəsizlik müşaviri, məşhur "G42" süni zəka şirkətinə nəzarət edən şeyx Tahnun bin Zayed Al Nəhyan ötən il Tramp ailəsinin əsas biznes tərəfdaşına çevrilib. Hazırda "G42" şirkətinin nəzarət səhm paketinin ABŞ investorlarına ötürülməsi və onun tamamilə Amerika şirkətinə çevrilməsi istiqamətində gizli danışıqlar aparılır.
Musavat.com
