İran Bolqarıstana sərt xəbərdarlıq ünvanlayıb. Xəbərdarlıq Bolqarıstan hakimiyyətinin ABŞ hərbi hava qüvvələrinə məxsus yanacaqdaşıyan təyyarələrin ölkə ərazisində müvəqqəti yerləşdirilməsinə razılıq verməsi fonunda səsləndirilib.
Musavat.com xəbər verir ki, İran tərəfi belə addımın Bolqarıstanı Yaxın Şərqdəki gərginliyin bir hissəsinə çevirə biləcəyini iddia edib.
İran mediasında yayılan məlumatlarda bildirilir ki, ABŞ-ın yanacaqdaşıyan təyyarələrinin Bolqarıstanın cənub-şərqində yerləşən Bezmer aviabazasında yerləşdirilməsi NATO-nun bölgədəki hərbi imkanlarını artıracaq. Tehran isə bunu öz milli təhlükəsizliyi üçün risk hesab etdiyini gizlətmir.
Nəşrlərdə vurğulanır ki, əgər Bolqarıstan öz ərazisini ABŞ-ın İrana qarşı mümkün hərbi əməliyyatları üçün platformaya çevirərsə, bu ölkə də potensial cavab tədbirlərinin hədəfinə çevrilə bilər. Xəbərdarlıq daha çox siyasi və psixoloji təzyiq xarakteri daşısa da, regionda artan gərginliyin növbəti əlaməti kimi qiymətləndirilir.
Qeyd edək ki, Bolqarıstan bundan əvvəl də İran və ABŞ-İsrail qarşıdurmasının kəskinləşdiyi dövrdə Tehrandakı səfirliyinin fəaliyyətini təhlükəsizlik səbəbindən Bakıya köçürmüşdü. Bu addım iki ölkə arasındakı münasibətlərdə yaranmış həssaslığın göstəricilərindən biri hesab olunurdu.
Analitiklərin fikrincə, İranın Bolqarıstana yönəlmiş bu bəyanatı əslində NATO üzvlərinə ünvanlanan daha geniş mesajın tərkib hissəsidir. Tehran ABŞ-ın Avropadakı hərbi infrastrukturunun İrana qarşı istifadə oluna biləcəyini düşündüyü ölkələrə xəbərdarlıq etməklə çəkindirmə siyasətini davam etdirir. Bununla yanaşı, NATO ölkələrinin əksəriyyəti alyans öhdəlikləri çərçivəsində ABŞ qüvvələrinə dəstəyin müdafiə xarakteri daşıdığını bildirir.
Son günlər Yaxın Şərqdə müşahidə olunan gərginlik fonunda bu cür bəyanatlar regiondakı təhlükəsizlik mühitinin daha da həssaslaşdığını göstərir. Hələlik Bolqarıstan və NATO tərəfindən İranın yayılan xəbərdarlığına rəsmi münasibət açıqlanmayıb.
E.Məmmədəliyev,
Musavat.com
