İranda son dövrlər güclənən millətçilik dalğası diplomatların fəaliyyətini çətinləşdirir. Bu vəziyyət ABŞ ilə hərbi əməliyyatların uzunmüddətli dayandırılması və sanksiyaların yumşaldılması istiqamətində aparılan danışıqlara ciddi maneələr törədir.
Musavat.com xəbər verir ki, müharibə və ali rəhbər Əli Xameneinin ölümündən sonra ölkə rəhbərliyi cəmiyyəti birləşdirmək məqsədilə vətənpərvərlik ritorikasından fəal şəkildə istifadə edib.
Lakin indi mühafizəkar deputatlar, dövlət mediası və sərt xətt tərəfdarları yaranmış bu əhvali-ruhiyyədən danışıqlar aparan heyətin Vaşinqtonla hər hansı bir güzəştə getmək imkanlarını məhdudlaşdırmaq üçün yararlanırlar.
Tərəflər arasında əsas mübahisə nöqtələrindən biri Hörmüz boğazı olaraq qalır. İlkin razılaşmalara əsasən, İran bu strateji keçidi 30 gün ərzində beynəlxalq gəmiçilik üçün açmalı idi, lakin bu öhdəlik yerinə yetirilməyib.
Əksinə, İslam İnqilabı Keşikçiləri Korpusu (SEPAH) ticarət gəmilərinə hücumları davam etdirib və Tehranın boğaz üzərində tam nəzarəti saxlamalı olduğunu bəyan edərək Hörmüzü bağlı elan edib.
Tehranın bu addımına cavab olaraq Donald Tramp İran limanlarının dəniz blokadasını bərpa edib və İrana qarşı hərbi zərbələrin davam etdirilməsi barədə əmr verib. ABŞ və Qətərin vasitəçiliyi ilə danışıqları yenidən canlandırmaq cəhdləri də nəticəsiz qalıb.
ABŞ və vasitəçi mənbələrin verdiyi məlumata görə, iranlı diplomatlar əslində kompromis yolları axtarmağa hazırdırlar, lakin onların hərəkət imkanları ölkə daxilindəki radikal siyasi qüvvələrin və ictimaiyyətin sərt təzyiqi ilə məhdudlaşdırılır.
Belə ki, Əli Xameneinin dəfn mərasimində kütlə tərəfindən "Trampa ölüm" şüarları səsləndirilib, Prezident Məsud Pezeşkian isə radikal qruplar tərəfindən "Xainlərə ölüm" və "Münasibətləri normallaşdıranlara ölüm" qışqırıqları ilə qarşılanıb.
Musavat.com
