Çin Sakit okeanda nüvə sualtı qayığından uzaqmənzilli ballistik raketin sınaq buraxılışını həyata keçirib.
Musavat.com xəbər verir ki, rəsmi Pekin raketin döyüş başlığı əvəzinə təlim məqsədli yük daşıdığını və sınağın illik hərbi hazırlıq proqramının tərkib hissəsi olduğunu açıqlayıb. Bununla belə, sınaq Yaponiya, Avstraliya və Yeni Zelanda başda olmaqla region ölkələrində narahatlıq yaradıb.
Çin dövlət mediasının məlumatına görə, raket müəyyən edilmiş vaxtda nüvə sualtı qayığından uğurla buraxılıb və beynəlxalq sularda əvvəlcədən müəyyənləşdirilmiş hədəf əraziyə çatıb. Buraxılışın beynəlxalq qaydalara uyğun həyata keçirildiyi bildirilsə də, raketin düşdüyü dəqiq koordinatlar açıqlanmayıb. Hərbi ekspertlər bunu Çinin dəniz bazalı nüvə qüvvələrinin imkanlarını nümayiş etdirmək baxımından mühüm addım kimi qiymətləndirirlər.
Analitiklərin fikrincə, bu cür sınaqlar təkcə raketin texniki göstəricilərini deyil, həm də nüvə sualtı qayığının əməliyyat imkanlarını və ölkənin uzaqmənzilli çəkindirmə potensialını yoxlamağa xidmət edir. Buna görə də keçirilən sınaq Çin Hərbi Dəniz Qüvvələrinin strateji imkanlarının inkişafı baxımından əhəmiyyətli hesab olunur.
Sınaqdan əvvəl Çin Avstraliya, Yaponiya və Yeni Zelandanı məlumatlandırdığını bildirsə də, həmin ölkələr raket buraxılışının regional təhlükəsizlik baxımından narahatlıq doğurduğunu bəyan ediblər. Xüsusilə Sakit okean regionunda artan hərbi fəallığın yeni gərginliklər yarada biləcəyi vurğulanıb. Çin isə buraxılışın rutin hərbi təlim çərçivəsində həyata keçirildiyini və heç bir ölkəni hədəf almadığını bildirərək beynəlxalq ictimaiyyəti hadisəni şişirtməməyə çağırıb.
Musavat.com
