Rusiya xarici vətəndaşlarla bağlı ciddi hüquqi dəyişikliklərə hazırlaşır.
Musavat.com xəbər verir ki, Rusiya Dövlət Dumasının dövlət quruculuğu və qanunvericilik komitəsi Rusiya Silahlı Qüvvələrində müqavilə əsasında xidmət etmiş və döyüş əməliyyatlarında iştirak etmiş əcnəbilərin və vətəndaşlığı olmayan şəxslərin başqa dövlətlərə ekstradisiyasının qadağan edilməsini nəzərdə tutan qanun layihəsinin birinci oxunuşda qəbulunu tövsiyə edib.
Qanun layihəsinə əsasən, Rusiya Cinayət-Prosessual Məcəlləsinə dəyişikliklər təklif olunur. Dəyişikliklərə görə, Rusiya ordusunda xidmət etmiş xarici şəxslər cinayət məsuliyyətinə cəlb olunmaq və ya məhkəmə hökmünün icrası üçün digər ölkələrə təhvil verilə bilməz.
Sənəddə qeyd olunur ki, bu təşəbbüs təkcə ekstradisiyanı deyil, eyni zamanda deportasiya və inzibati qaydada ölkədən çıxarılmanın da qadağan edilməsini nəzərdə tutan qanunvericilik paketinin tərkib hissəsidir. Yəni Rusiya Silahlı Qüvvələrində xidmət etmiş əcnəbilər gələcəkdə ölkə ərazisindən zorla çıxarıla da bilməyəcək.
Ekspertlərin fikrincə, bu addım Moskvanın müharibədə iştirak edən xarici döyüşçüləri hüquqi baxımdan qorumaq və onları Rusiyaya daha sıx bağlamaq məqsədi daşıyır. Eyni zamanda, bu qərar beynəlxalq hüquq müstəvisində ciddi mübahisələrə yol aça bilər.
Hesab olunur ki, yeni qanun layihəsi Rusiya ordusunda döyüşmüş əcnəbilərin mümkün hərbi cinayətlərə görə beynəlxalq təqibdən yayınması üçün mexanizm rolunu oynaya bilər. Bu isə Moskva ilə Qərb ölkələri arasında onsuz da gərgin olan münasibətləri daha da kəskinləşdirə bilər.
Beləliklə, Rusiya hakimiyyəti xarici döyüşçülərlə bağlı qapıları bağlayan və onları hüquqi toxunulmazlıqla təmin edən yeni xətt formalaşdırır. Qanun layihəsinin parlamentdə qəbul ediləcəyi təqdirdə, bu qərar beynəlxalq arenada geniş rezonans doğura bilər.
Musavat.com
