Türkiyənin Manisa vilayətinin Kula rayonunda baş verən ağır zəncirvari yol-nəqliyyat hadisəsi iki nəfərin ölümü, dörd nəfərin isə yaralanması ilə nəticələnib.
Musavat.com Türkiyə mətbuatına istinadən xəbər verir ki, qəza İzmir–Uşak magistral yolunun Kula rayonundan keçən hissəsində, Kavacık enişi yaxınlığında qeydə alınıb.
Azərbaycan nömrə nişanlı yük avtomobili hərəkətdə olarkən qarşısındakı yüngül kommersiya nəqliyyat vasitəsinə çırpılıb. Toqquşmadan sonra daha bir yük avtomobili ona çırpılıb və nəticədə zəncirvari qəza baş verib.
Qəza nəticəsində yük avtomobilinin sürücüsü, Azərbaycan vətəndaşı Nadir Salmanov hadisə yerində həyatını itirib. Digər ölən şəxsin isə yüngül kommersiya avtomobilində olan Aytekin Akkaya olduğu bildirilib. Hadisə zamanı daha dörd nəfər müxtəlif dərəcəli bədən xəsarətləri alaraq xəstəxanaya çatdırılıb.
Hadisə yerinə polis, yanğınsöndürmə və təcili tibbi yardım briqadaları cəlb olunub. Qəza səbəbindən magistral yolda nəqliyyatın hərəkətində ciddi çətinliklər yaranıb. Həlak olanların cəsədləri ekspertiza üçün morqa göndərilib.
Faktla bağlı araşdırma aparılır.
Şahanə Rəhimli
Musavat.com
