Yaxın Şərqdə artan gərginlik fonunda ABŞ Körfəz bölgəsində hərbi mövcudluğunu gücləndirib.
Musavat.com xəbər verir ki, Vaşinqton İranla mümkün qarşıdurma riskinə qarşı yeni hava hücumundan müdafiə sistemləri, döyüş sursatı və hərbi texnika yerləşdirməyə başlayıb. ABŞ rəsmiləri bu addımın məqsədinin bölgədəki müttəfiqləri və beynəlxalq gəmiçiliyi qorumaq olduğunu bildirirlər.
Məlumata görə, ABŞ-ın təsdiqlədiyi yeni hərbi yardım paketinə hava-hava raketləri, hava hücumundan müdafiə radarları, pilotsuz uçuş aparatlarına qarşı sistemlər və digər müasir silahlar daxildir. Bu texnikanın əsas hissəsi Birləşmiş Ərəb Əmirlikləri, Küveyt və İordaniyaya göndərilir. Ümumi dəyəri 16 milyard dollardan çox olan paket son aylarda bölgəyə ayrılan ən iri hərbi dəstək proqramlarından biri hesab olunur.
ABŞ administrasiyası bildirir ki, yeni silah sistemlərinin yerləşdirilməsi İranla bağlı təhlükəsizlik risklərinin artması və Hörmüz boğazında ticarət gəmilərinin təhlükəsizliyinin təmin edilməsi məqsədi daşıyır. Vaşinqton bölgədə hava hücumundan müdafiə imkanlarını genişləndirməyə və müttəfiq ölkələrin müdafiə qabiliyyətini artırmağa çalışır.
Bu addım regionda yeni hərbi yarışla bağlı narahatlıqları da artırıb. Analitiklər hesab edirlər ki, Körfəz ölkələrində silahlanmanın sürətlənməsi İranla ABŞ arasında onsuz da yüksək olan gərginliyi daha da dərinləşdirə bilər. Son aylarda bölgədə raket və pilotsuz uçuş aparatları ilə həyata keçirilən hücumlar fonunda təhlükəsizlik məsələləri yenidən beynəlxalq gündəmin əsas mövzularından birinə çevrilib.
Musavat.com
