Dünyanın ikinci böyük neft ixracatçısı olan Səudiyyə Ərəbistanı avqust ayında bütün alıcılar üçün neft qiymətlərini yenidən kəskin şəkildə endirəcək.
Musavat.com dövlətə məxsus Saudi Aramco şirkətinin açıqlamasına istinadən xəbər verir ki, Səudiyyə Ərəbistanı avqust ayında bütün bölgələrdə alıcılar üçün neft qiymətlərini kəskin şəkildə endirəcək.
Təchizat xərclərinin azalması iyul ayından daha əhəmiyyətli olacaq.
Asiyalı alıcılar üçün neft qiymətləri gələn ay 1 barelə 11 dollar düşəcək ki, bu da son iyirmi ildən çox müddətdə ən əhəmiyyətli azalmadır. Nəticədə, Arab Light (Asiyaya tədarük edilən əsas növ) Oman/Dubay xam neft səbətindən 1,50 dollar daha ucuz olacaq.
Səudiyyə Ərəbistanı neftinin qiymətləri avqust ayında Amerika müştəriləri üçün barel üçün 8 dollar, Şimal-Qərbi Avropa və Aralıq dənizi alıcıları üçün isə barel üçün 15 dollar düşəcək.
Saudi Aramco-nun qiymət qərarları neft bazarı üçün barometr rolunu oynayır: Səudiyyə şirkətinin qərarları bazardakı mümkün tendensiyanın göstəricisi sayılır. Bu baxımdan, avqust ayında dünya neft qiymətlərinin də kəskin azalması gözlənilir.
Musavat.com
