Rusiyanın Ukrayna şəhərlərinə, xüsusilə paytaxt Kiyevə qarşı həyata keçirdiyi son dərəcə intensiv və dağıdıcı raket-dron zərbələri beynəlxalq müstəviyə daşınır. Rəsmi Kiyev dinc əhali arasında çoxsaylı tələfata səbəb olan bu kütləvi hücumlarla əlaqədar olaraq BMT Təhlükəsizlik Şurasının təcili və növbədənkənar iclasının çağırılması təşəbbüsü ilə çıxış edib.
Musavat.com xəbər verir ki, Ukraynanın xarici işlər naziri Andrey Sibriqa özünün "X" sosial şəbəkəsindəki rəsmi hesabında bəyanat yayaraq ölkəsinin rəsmi müraciətini ictimaiyyətə açıqlayıb. Nazir vurğulayıb ki, Rusiyanın cəmi bir neçə gün ərzində reallaşdırdığı ikinci irimiqyaslı raket və pilotsuz uçuş aparatı hücumundan sonra Ukrayna BMT Təhlükəsizlik Şurasının fövqəladə iclasının keçirilməsini rəsmən tələb edir.
Sibriqa qanlı hücumların dəhşətli statistikasını da diqqətə çatdırıb: "Ötən gecə baş verən hücum nəticəsində Rusiya ən azı 11 dinc sakini qətlə yetirib və dağıntıların miqyasını nəzərə alsaq, bu rəqəmin artacağı istisna deyil. Bundan əvvəl, iyulun 2-də həyata keçirilən kütləvi zərbə isə Kiyevdə azı 31 dinc insanın həyatına son qoymuşdu".
Ukrayna XİN rəhbəri BMT Təhlükəsizlik Şurasında cari sədrlik edən Konqo Demokratik Respublikasına (KDR) və şuranın digər daimi və qeyri-daimi üzv dövlətlərinə müraciət edərək, Ukraynanın təcili iclas keçirilməsi barədə qanuni sorğusunu birmənalı şəkildə dəstəkləməyə çağırıb.
Musavat.com
