Rusiyanln Daxili İşlər Nazirliyinin anbarından metanol oğurluğu edərək "Mister Sidr” adlı zəhərli içkiydə istifadə edənlərdən daha biri həbs edilib.
Musavat.com Rusiya mediasına istinadla xəbər verir ki, Samara şəhərinin Oktyabrski rayon məhkəməsi Daxili İşlər Nazirliyinin anbarından "Cənab Sidr" surroqat içkisinin istehsal olunduğu metanolun oğurlanması işi üzrə ikinci müttəhim Dmitri Yeqorovu həbs edib.
Həmçinin polis zabiti İvan Qrebenkinin həbsi ilə bağlı müraciətə baxılması planlaşdırılır.
Samarada içki istehsalçısı Anar Hüseynova metil spirti tədarükü sxemində iştirak edən Artem Ayrapetyan isə istintaq təcridxanasına göndərilib.
İstintaqın məlumatına görə, may ayında Dmitri Yeqorov və onun atası Aleksey Yeqorov polis əməkdaşı İvan Qrebenkinin köməyi ilə Daxili İşlər Nazirliyinin Baş İdarəsinin İqtisadiyyat və Xidmətə Dəstək Mərkəzinin anbarından 6 ton metil spirti oğurlayıblar və onu Ayrapetyana satıblar. Ayrapetyan təhlükəli mayeni Hüseynova çatdırıb, o isə ondan surroqat “Cənab Sidr” spirtli içkisinin istehsalında istifadə edib. Nəticədə ölkənin müxtəlif bölgələrində 101 nəfər zəhərli mayedən zərər çəkib.
Ayrapetyan Rusiya Federasiyası Cinayət Məcəlləsinin 238-ci maddəsi (“Təhlükəsizlik tələblərinə cavab verməyən məhsulların istehsalı”) ilə ittiham olunub. Müstəntiqlər həmçinin Qrebenkin və Dmitri Yeqorovu oğurluqda ittiham ediblər, onlar təqsirli olduqlarını etiraf ediblər. Aleksey Yeqorov axtarışa verilib.
Hüseynov artıq həbs edilib və ona qarşı ittiham irəli sürülüb.
Musavat.com
