2026-cı il dünya çempionatının qrup mərhələsində ilk böyük sensasiyalardan biri qeydə alınıb. Futbol tarixinin ən titullu millisi olan Braziliya yığması C qrupundakı ilk oyununda Mərakeşlə 1:1 hesablı heç-heçə edib. Bu nəticə həm azarkeşlər, həm də futbol mütəxəssisləri üçün gözlənilməz olub.
ABŞ-ın Nyu-Cersi ştatındakı "MetLife Stadium"da keçirilən qarşılaşmada hesabı 21-ci dəqiqədə Mərakeş millisinin yarımmüdafiəçisi İsmail Saibari açıb. O, Braziliya müdafiəsinin səhvindən yararlanaraq topu qapıçı Alissonun üzərindən tora göndərib.
Braziliya isə cavabı gecikdirməyib. Matçın 32-ci dəqiqəsində Vinisius Junior Bruno Gimaraeşin ötürməsindən sonra hesabı bərabərləşdirib. Lakin oyunun qalan hissəsində Karlo Ançelottinin komandası qələbə qolunu vura bilməyib.
Qarşılaşmanın gedişində Mərakeş futbolçuları meydanda daha intizamlı və təşkilatlanmış oyun nümayiş etdiriblər. Afrika təmsilçisi xüsusilə ilk hissədə rəqibə yüksək təzyiq göstərərək Braziliyanın hücum xəttini zərərsizləşdirməyi bacarıb. Qapıçı Bono isə bir neçə təhlükəli epizodda komandasını qoldan xilas edib.
Beləliklə, dünya çempionatlarının beşqat qalibi olan Braziliya turnirə gözlənilməz xal itkisi ilə başlayıb. Mərakeş isə son illərdə dünya futbolunda təsadüfi uğur qazanmadığını bir daha sübut edərək daha bir tarixi nəticəyə imza atıb. 2022-ci il mundialında yarımfinala qədər yüksələn Atlas şirləri bu dəfə də favoritlərdən birinə qarşı xal qazanaraq iddiasını ortaya qoyub.
Cavanşir Abbaslı,
Musavat.com
