Mütəxəssislər bildirirlər ki, bir çox mətbəx əşyası illərlə şkaf və siyirtmələrdə qalsa da, artıq praktik əhəmiyyətini itirib.
Mətbəxdə qayda yaratmaq üçün artıq istifadə olunmayan əşyalardan vaxtaşırı xilas olmaq tövsiyə edilir.
Mətbəx evdə ən çox istifadə olunan məkanlardan biri olduğuna görə zaman keçdikcə burada istifadə edilməyən çoxsaylı əşyalar toplanır. Onların bir hissəsi sadəcə vərdişə görə və ya "bəlkə nə vaxtsa lazım olar" düşüncəsi ilə saxlanılır. Lakin dolu siyirtmələr və qarışıq rəflər gündəlik yemək hazırlığını çətinləşdirə bilər.
Mütəxəssislər mətbəxdən çıxarılması məqsədəuyğun olan 8 əşyanı sadalayıblar.
1. Cızılmış plastik qablar
Plastik saxlama qabları rahat istifadə olunsa da, onların istifadə müddəti məhduddur. Dərin cızıqlarda bakteriyalar daha asan toplanır, köhnəlmiş qablar isə rəngini dəyişə və xoşagəlməz qoxuları özünə çəkə bilər.
Qapağı olmayan və ya uyğun qapağı itmiş qabların da saxlanılmasının mənası olmadığı bildirilir.
2. Köhnə ədviyyatlar
Qurudulmuş ədviyyatlar uzun müddət xarab olmasa da, zaman keçdikcə ətir və dadını itirir. İllərlə açıq vəziyyətdə saxlanılan oreqano, karri və ya üyüdülmüş qırmızı bibər artıq yeməklərə əvvəlki ləzzəti verməyə bilər.
3. Köhnə qab yuma süngərləri
Qab yuma süngərləri mətbəxdə ən çox bakteriya toplayan əşyalardan biri hesab olunur. Rütubətli mühit mikroorqanizmlərin çoxalmasına şərait yaratdığı üçün süngərlər uzun müddət istifadə edilməməlidir.
Əgər süngər xoşagəlməz qoxu verirsə, dağılmağa başlayıbsa və ya rəngi dəyişibsə, onu yenisi ilə əvəz etmək tövsiyə olunur.
4. Köhnə taxta doğrama lövhələri
Taxta doğrama lövhələri uzunömürlü olsa da, əbədi istifadə üçün nəzərdə tutulmayıb. Dərin bıçaq izlərində bakteriyalar toplana bilər və belə səthləri tam təmizləmək çətinləşir.
Lövhə çatlayıbsa, deformasiyaya uğrayıbsa və ya rəngi ciddi şəkildə dəyişibsə, onun yenisi ilə əvəz olunması məsləhətdir.
5. Artıq mətbəx alətləri
Bir çox evdə illər ərzində eyni funksiyanı yerinə yetirən bir neçə taxta qaşıq, konserva açanı və ya tərəvəzsoyacağı toplanır. Halbuki gündəlik istifadə zamanı onların yalnız bir neçəsindən istifadə olunur.
İstifadə edilməyən alətlərin çeşidlənməsi mətbəxdə daha çox yer yaradacaq və qayda yaradılmasına kömək edəcək.
6. İstifadə müddəti bitmiş və ya mənşəyi bilinməyən ərzaqlar
Anbar və soyuducudakı məhsulların mütəmadi yoxlanılması tövsiyə edilir. Rəflərdə çox vaxt istifadə müddəti başa çatmış konservlər, souslar və ya açıldığı tarix bilinməyən məhsullar qalır.
Belə hallarda ərzaqları saxlamaq əvəzinə utilizasiya etmək daha təhlükəsiz hesab olunur.
7. Çatlamış və ya qırılmış qab-qacaq
Çoxları sevdiyi fincan və ya boşqab zədələnsə də, onu istifadə etməyə davam edir. Lakin çat və qırıq hissələrdə çirk toplanır, iti kənarlar isə xəsarət riski yaradır.
8. İllərlə istifadə olunmayan məişət texnikası
Vafli bişirən cihazlar, blenderlər və digər məişət texnikası uzun müddət istifadə edilmirsə, sadəcə şkafda yer tutur.
Mütəxəssislər bildirirlər ki, son bir-iki ildə istifadə edilməyən işlək cihazlar satıla, hədiyyə edilə və ya xeyriyyə məqsədilə bağışlana bilər.//Demokrat.az
