Amerikanın Baltimor şəhərində (Merilend ştatı) Patapsko çayı üzərində Frensis Skott Key adına körpünün uçması dünya gündəmində böyük müzakirələrə səbəb olub.
Musavat.com xəbər verir ki, “Dali” konteyner gəmisinin toqquşması nəticəsində körpü uçub.
Gəmi Sinqapur bayrağı altında Baltimordan Şri-Lankanın ən böyük şəhəri Kolomboya doğru üzürdü. Bu gəminin uzunluğu 300 metrdir və təxminən 100 min tona yaxın yükgötürmə qabiliyyətinə malikdir.
Toqquşmadan sonra konteyner gəmisi alovlanıb, lakin suda qalıb, polad körpünün bir neçə mərkəzi aşırımları suya düşüb. Qəza zamanı körpüdə ən azı dörd avtomobil və keçiddə işləyən yeddi inşaat işçisi olub - hazırda onlar itkin düşənlər siyahısındadır.
Qurbanların ümumi sayı hələ məlum deyil, lakin Baltimor səlahiyyətliləri onların çox olacağını güman edirlər - körpü mühüm tranzit magistralın bir hissəsidir və avtomobillərdən əlavə, orada piyadalar da ola bilərdi.
Dörd zolaqlı Francis Scott Key (ABŞ himninin sözlərinin müəllifi) körpüsü 1977-ci ildə tikilib və uzunluğu dünyanın ən böyük truss strukturlarından biri olaraq qalıb.
Təxminən 2,7 kilometr uzunluğundakı struktur Baltimor ətrafındakı kəmər yol olan Merilend marşrutu 695-in bir hissəsi idi. Hər il körpüdən təhlükəli yük daşıyanlar da daxil olmaqla 11,5 milyon avtomobil keçirdi.
CNN-in məlumatına görə, körpüyə xidmət edən Baltimor limanı 80 milyard dollardan çox dəyəri olan 52 milyon tondan çox beynəlxalq yük daşıyıb və bu, ABŞ limanları arasında doqquzuncudur.
Merilend ştatının qubernatoru Ues Mur körpünün uçması ilə əlaqədar fövqəladə vəziyyət elan edib. O əlavə edib ki, xilasetmə işlərini aparan federal, əyalət və yerli qurumlarla sıx əlaqə saxlayacaq.
Körpü hazırda nəqliyyatın hərəkəti üçün bağlıdır. “Hazırda bütün zolaqlar bağlanıb və nəqliyyatın hərəkəti liman tunelindən və ya şəhərdən keçməklə aparılır”, - dövlət nəqliyyat departamentindən bildiriblər.
İndependent qəzeti iddia edir ki, strukturun böyük hissəsi su altında qalıb. Fövqəladə hallar xidmətləri körpüdə qalan yüklərin ağırlıq saldığını, buna görə də təcili yardım xidmətlərinin ehtiyatlı davrandığını bildirib.
Konteyner gəmisinin ətrafında böyük bir dizel yanacağı sızıntısı aşkar edilib və ekipaj üzvlərindən hələ də gəminin içərisində qalanların ola biləcəyi güman edilir.
Son məlumatlara görə, iki nəfər sudan xilas edilib - onlardan biri xəsarət almayıb, ikincisi isə ağır vəziyyətdə travmatologiya şöbəsinə yerləşdirilib. Qurbanların dəqiq sayı hələlik məlum deyil, lakin suya düşən insanların sağ qalma şansları azdır - Patapsko çayında gecə saatlarında temperatur təxminən 8 dərəcə Selsi olub.
Musavat.com
