Krım yarımadasında yanacaq və bəzi ərzaq məhsulları ilə bağlı problemlərin yaşandığı bir vaxtda ukraynalı siyasi texnoloq Mixail Şeytelman bölgədəki vəziyyətlə bağlı öz qiymətləndirmələrini bölüşüb.
Musavat.com xəbər verir ki, Şeytelmanın sözlərinə görə, son illərdə Krımın logistika imkanları zəifləyib və bu da yarımadanın təminatına təsir göstərir.
Mixail Şeytelmanın sözlərinə əsasən, Krımın logistika imkanları son illərdə ciddi şəkildə zəifləyib.
“Üç bərənin hamısı sıradan çıxarılıb. Onlardan biri yanacaq daşıyan sisternlərlə birlikdə məhv edilib. Yeni bərələr yoxdur. Körpü üzərindən yanacaq daşıyan dəmir yolu sisternləri əvvəlki kimi hərəkət etmir. Hərbi yüklər ehtiyatla daşınır, mülki yük maşınlarının hərəkəti isə məhdudlaşdırılıb. İndi Rusiya həm ordunu sursat, yanacaq və ərzaqla təmin etməli, həm də bunu əvvəlkindən qat-qat mürəkkəb şəraitdə etməlidir”, – deyə o bildirib.
Ekspert Krımın xarici təchizatdan asılılığının daha da nəzərə çarpdığını vurğulayıb.
“Krımdan yayılan videolarda insanlar “Lukoyl”a üz tuturlar. Amma bununla onlar əslində Rusiyaya, yəni sərhədin o tayına getməyi nəzərdə tuturlar. Hətta indi də yarımadada normal şəbəkə yanacaqdoldurma məntəqələri yoxdur. İnsanlar keyfiyyətsiz yanacaq satıldığından şikayət edirlər”, – deyə Şeytelman qeyd edib.
Siyasi texnoloq yarımadanın demoqrafik mənzərəsinin də son illərdə ciddi şəkildə dəyişdiyini iddia edib.
“Tammiqyaslı müharibənin başlanğıcı zamanı Krımda təxminən 600 min mülki Rusiya vətəndaşı yaşayırdı. Bu, yarımada əhalisinin təxminən üçdə birinə bərabər idi. 2022-ci ildən sonra çoxlu sayda ukraynalı bölgəni tərk edib, onların yerinə rusiyalılar, hərbçilər və onların ailə üzvləri gəlib. Bu gün vəziyyət yoxlanılsa, düşünürəm ki, Krımın hazırkı əhalisinin yarıdan çoxunun artıq ukraynalı olmadığı ortaya çıxar”, – deyə o bildirib.
Şeytelman Krımda daşınmaz əmlak alan rusiyalılardan da danışıb.
“Düşünürəm ki, artıq çoxları başa düşüb ki, Krımda mənzil almaq yaxşı investisiya olmayıb. İnsanlar pullarını xərcləyiblər, amma həmin vəsaitin geri qayıdacağına zəmanət yoxdur. Ora ya çox sadəlövh insanlar, ya da o qədər də öz pulları olmayan şəxslər yatırım ediblər”, – deyə ekspert bildirib.
Krımın gələcək statusu barədə danışan Şeytelman vurğulayıb ki, Ukraynada bu məsələ müzakirə predmeti deyil:
“Ukraynada heç kim Krımın Ukrayna ərazisi olması məsələsini mübahisə etmir. Simferopoldan, Sevastopoldan və yarımadanın digər şəhərlərindən olan insanlar yaşayırlar. Buna görə də heç kim deyə bilməz ki, bir ərazini qaytaracağıq, digərini isə yox”.
Qeyd edək ki, Mixail Şeytelman Ukraynanın tanınmış siyasi texnoloqlarından biridir və müsahibədə səsləndirdiyi fikirlər onun şəxsi qiymətləndirmələrini əks etdirir.
Musavat.com
