Dövlət Dumasının deputatları plenar iclasda Rusiyada işləmək istəyən miqrant işçilər üçün əlavə tələbləri nəzərdə tutan qanun layihəsini ikinci və üçüncü oxunuşda qəbul ediblər.
Musavat.com xarici mediaya istinadla xəbər verir ki, təklif olunan dəyişikliklər "Rusiya Federasiyasında xarici vətəndaşların hüquqi statusu haqqında" qanuna aiddir. Təşəbbüsdə miqrant işçilərin özlərini və Rusiyada yaşayan ailə üzvlərini yaşayış minimumunun regional əmsalla vurulmasından aşağı olmayan səviyyədə təmin etmələri tələb olunur. Əks halda, onların patentləri və ya iş icazələri yenilənməyəcək və bundan sonra onlar 15 gün ərzində azyaşlı uşaqları ilə birlikdə ölkəni tərk etməli olacaqlar.
Bundan əlavə, qanunda miqrant işçilərin uşaqlarının yalnız valideynlərinin iş icazəsi müddətində Rusiya Federasiyasında qala biləcəkləri nəzərdə tutulur. Həmçinin miqrant işçinin özü və hər bir uşaq üçün əvvəlcədən fərdi gəlir vergisi ödəməli olacaq. 18 yaşı tamam olan miqrant uşaqlar 30 gün ərzində Rusiya Federasiyasını tərk etməli və ya göstərilən müddət ərzində patent üçün müraciət etməlidirlər.
Musavat.com
