Rusiya İstanbulda işlədiyi hotelin sahibini öldürməkdə təqsirli bilinərək İnterpol xətti ilə axtarışda olan Özbəkistan vətəndaşı Xasanjon Aminovu Türkiyə hüquq-mühafizə orqanlarına təhvil verib.
Musavat.com-un məlumatına görə, bu barədə TASS-a Rusiya Daxili İşlər Nazirliyinin rəsmi nümayəndəsi İrina Volk məlumat verib:
"Bu gün A.N.Tupolev adına Vnukovo Beynəlxalq Hava Limanında Rusiya Daxili İşlər Nazirliyinin İnterpol Milli Mərkəzi Bürosunun və Rusiya Federal Penitensiar Xidmətinin əməkdaşları Özbəkistan vətəndaşı Xasanjon Aminovu Türkiyə Respublikasının hüquq-mühafizə orqanlarının nümayəndələrinə təhvil veriblər. O, qəsdən adam öldürmə ittihamı ilə İnterpol kanalları ilə axtarışa verilib".
Volk qeyd edib ki, Türkiyənin səlahiyyətli orqanlarının məlumatına görə, 2019-cu ilin iyul ayında İstanbulda hotelin əməkdaşı olan Aminov şəriki ilə birlikdə sahibini öldürərək Türkiyəni tərk edib:
"2023-cü ilin iyulunda təqsirləndirilən şəxsin axtarışı zamanı o, Rusiya Federasiyasının ərazisində Kazan şəhərində polis tərəfindən saxlanılıb".
2023-cü ilin dekabrında Rusiya Baş Prokurorluğu Türkiyə tərəfinin axtarışda olan şəxsin ekstradisiyası ilə bağlı vəsatətini təmin edib.
Musavat.com
