Qırğızıstan Parlamentinin spikeri Nurlanbek Şakiyev soyadını dəyişərək Turgunbek Uulu adını qəbul edib.
Musavat.com xəbər verir ki, bu qərarı ilə bağlı spiker öz şəxsi fikirlərini ictimaiyyətlə bölüşüb və soyad dəyişdirməsinin milli kimliyi vurğulamaq üçün atılmış bir addım olduğunu bildirib.
Nurlanbek Turgunbek Uulu qeyd edib ki, soyad dəyişdirmək şəxsi bir qərardır və bu mövzuda hər kəsin seçim azadlığı var. O, Qırğızıstan parlamentində millət vəkilləri Mirlan Samıkoco və Amankan Kenjebayevin birgə təşəbbüsü ilə irəli sürülən qanun layihəsinə əsasən, soyadların milli xüsusiyyətlərə uyğun olaraq yazılış variantlarının təqdim edildiyini bildirib. Spiker bu variantlardan birini seçərək öz soyadını dəyişib.
Turgunbek Uulu çıxışında vurğulayıb ki, Qırğız xalqı nə qədər dəyişsə də, heç vaxt ərəb, amerikalı, rusiyalı və ya avropalı ola bilməz:
“Başqalarına bənzəməyə çalışarkən öz həqiqi kimliyimizi unuduruq və onlara oxşamağa başlayırıq. İndi isə yenilənmə, öz köklərimizə qayıtma və milli kimliyimizi dirçəltmə vaxtıdır.”
Bu açıqlamalar Qırğızıstanda milli dəyərlərin qorunması və mədəni irsin yenidən ön plana çəkilməsi mövzusunda geniş müzakirələrə səbəb olub. Spikerin bu addımı ölkədə milli özünüdərkin gücləndirilməsi istiqamətində mühüm bir jest kimi qiymətləndirilir.
Musavat.com
