Mel Gibson Los-Ancelesdəki yanğınlarda evinin tamamilə yanıb, kül olduğunu açıqlayıb.
Oskar mükafatlı aktyor Mel Gibson, Los-Ancelesdəki meşə yanğınları zamanı evinin tamamilə dağıldığını təsdiqləyib.
Musavat.com xarici mediaya istinadən bildirir ki, aktyor yanğınla bağlı Kaliforniya qubernatoru Qeyvin Nevsomu
məsuliyyətsizlikdə ittiham edib.
Qeyd edək ki, Kaliforniyada baş verən meşə yanğınları nəticəsində minlərlə bina məhv olub, on minlərlə sakin təxliyə edilib, ən azı 10 nəfər həyatını itirib.
Yanğınların daha da güclənəcəyi ehtimal olunur, çünki güclü küləklər alovun yayılmasını sürətləndirir.
Gibson, Texasın Ostin şəhərində iştirak etdiyi "The Joe Rogan Experience" proqramında çıxışı zamanı, evi dağılsa da özünü "rahat" hiss etdiyini söyləyib:
"Bu, dağıdıcı və emosional bir hadisədir. Amma eyni zamanda əşyalarımın yükündən azad olmuşam, onların hamısı kül olub".
15 ildən çoxdur həmin mülkdə yaşadığını bildirən Gibson, qonşularından bəzilərinin də evlərini itirdiyini əlavə edib. Onların arasında aktyor Ed Harrisin də evi var. Aktyor, ailəsinin evakuasiya əmrinə əməl etdiyini və təhlükəsizdə olduğunu vurğulayıb.
Gibson, Kaliforniya qubernatoru Qeyvin Nevsomu sərt şəkildə tənqid edərək deyib:
"Nevsom meşələri qoruyacağını deyirdi, amma heç nə etmədi. Görünür, vergilərimiz Qeyvnin saç geli üçün xərclənib".
Yanğınsöndürmə xidmətinin rəhbəri Devid Asuna, yaxın günlərdə küləyin təsiri ilə daha böyük dağıntıların ola biləcəyini bildirib.
ABŞ-ın yeni seçilmiş prezidenti Donald Tramp, Kaliforniya qubernatorunu böhranı idarə edə bilməməkdə ittiham edib və istefaya çağırıb. Nevsom isə öz işini müdafiə edərək dövlətin bütün resurslarını yanğınsöndürmə işlərinə səfərbər etdiyini qeyd edib. Prezident Co Bayden isə federal resurslarla Kaliforniyaya dəstək olacağına söz verib.
Yanğınlarda evlərini itirən məşhurlar
Meşə yanğınları bir çox tanınmış şəxsin mülkünü də məhv edib:
Paris Hilton mülkünün qalıqlarını paylaşaraq "ürək ağrısını" ifadə edib.
Billi Kristal və həyat yoldaşı 40 ildən çox yaşadıqları evlərini itirdiklərini deyiblər.
Rikki Leyk, Rein Uilson, Entoni Hopkins, Anna Faris və digər məşhurlar evlərindən məhrum olublar.
Yanğınlar yalnız evləri deyil, həm də sakinlərin həyatını tamamilə dəyişdirib. Bir çox insan yardıma ehtiyac duyur və bölgədə vəziyyət hələ də gərgin olaraq qalır.
Xalidə Gəray
Musavat.com
