Kanadanın keçmiş baş naziri Jan Kretyen (1993-2003) ABŞ-ın yeni seçilmiş prezidenti Donald Trampa çağırış edib.
Musavat.com xəbər verir ki, onun bununla bağlı yazısı “Globe” and “Mail” tərəfindən dərc edilib.
Jan Kretyenin sözlərinə görə, kanadalılar öz müstəqilliklərini yüksək qiymətləndirirlər, onları təhdid və təhqirlərdən çəkindirmək mümkün deyil.
“Donald Tramp, bir qocanın başqa qocaya dediyini deyirəm: Özünə gəl!”, - deyə kanadalı siyasətçi yazıb.
“Kanada ABŞ-dan əvvəl hər iki dünya müharibəsinə girdi, döyüşdü və təsəvvür edə bildiyimizdən çox fədakarlıq etdi. Bundan başqa, Kanada bizi İraqda tamamilə əsassız və sabitliyi pozan müharibəyə sürükləməyə çalışarkən ölkənizə “yox” deməyə cəsarət etdi”, - deyə Jan Kretyen bildirib.
Keçmiş baş nazir Kanadada federal və yerli siyasətçilərə müraciət edərək onlardan möhkəm və səbatlı olmağı tələb edib.
“Hokkeydə tək müdafiə oynamaqla qalib gəlmirsən. Hamımız bilirik ki, biz bir tələbi ödədikdə belə, cənab Tramp başqa, daha da böyük tələblə qayıdır. Bu, diplomatiya deyil, şantajdır. Bu qapalı dairəni qıran fərqli yanaşma lazımdır”, - deyə Kretyen əlavə edib.
Köşə yazısı dərc olunan gün Jan Kretyenin 91 yaşı tamam olub. Bu ilin iyununda isə Trampın 79 yaşı tamam olacaq.
Musavat.com
