Özəl sektorda məcburi əməkdən əldə edilən qeyri-qanuni mənfəət 2014-cü ildən bəri qlobal miqyasda 37 faiz artaraq hər il 236 milyard dollara çatıb.
Musavat.com xəbər verir ki, bu məlumat BMT-nin ixtisaslaşmış qurumu olan Beynəlxalq Əmək Təşkilatının (BƏT) hesabatında təqdim olunub.
Sənəddə deyilir ki, 2014-cü ildən bəri məcburi əməkdən əldə edilən qeyri-qanuni gəlirlərin ümumi həcmi 64 milyard dollar və ya 37 faiz artıb. BƏT qeyd edir ki, bu artım həm “işləməyə məcbur olan insanların sayının artması, həm də qurbanların istismarından əldə edilən gəlirlərin artması” ilə bağlıdır.
Mütəxəssislər belə nəticəyə gəliblər ki, “insan alverçiləri və cinayətkarlar hər qurbana görə təxminən 10.000 dollar qazanırlar”. On il əvvəl bu qazanc 8.200 dollar idi.
Məcburi əməkdən ən yüksək illik qeyri-qanuni gəlir Avropa və Mərkəzi Asiyada (84 milyard dollar) əldə edilir. Ondan sonra Asiya-Sakit okean regionu (62 milyard dollar), Amerika (52 milyard dollar), Afrika (20 milyard dollar) və ərəb ölkələri (18 milyard dollar) gəlir.
Hesabatda qeyd edilir ki, “məcburi kommersiya seksual istismarı ümumi qeyri-qanuni gəlirlərin üçdə ikisindən çoxunu (73 faiz) təşkil edir”. Bu, məcburi əmək qurbanlarının ümumi sayının 27 faizini təşkil edir. Sənaye məcburi əməkdən 35 milyard dollar gəlir əldə edir. Ondan sonra xidmətlər (20,8 milyard dollar), kənd təsərrüfatı (5 milyard dollar) və ev işləri (2,6 milyard dollar) gəlir.
Hesabat müəllifləri izah ediblər ki, bu qeyri-qanuni gəlirlər işçilərə ödənilməli olan əmək haqqıdır, lakin bunun əvəzində məcburi təcrübələr nəticəsində onların istismarçılarında qalır.
Ekspertlərin hesablamalarına görə, 2021-ci ildə hər gün 27,6 milyon insan məcburi əməyə cəlb edilib. 2016-2021-ci illərdə məcburi əməyə məcbur edilənlərin illik sayı 2,7 milyon nəfər artıb.
Musavat.com
