Rusiya yüzlərlə Peru vətəndaşını təhlükəsiz və yüksək maaşlı iş yerləri ilə bağlı yalan vədlərlə ordusuna cəlb edib Ukraynaya göndərir.
Musavat.com CNN-ə istinadən xəbər verir ki, rusiyalı işəgötürənlər sosial mediadan istifadə edərək Perunun yoxsul təbəqəsi arasında fəal şəkildə muzdlu əsgər axtarırlar.
Kişilərə arxa cəbhədə mühafizəçi və ya aşpaz kimi işlər təklif olunur, müqavilə imzaladıqları üçün 20.000 dollar bonus, aylıq 4000 dollara qədər maaş və Rusiya vətəndaşlığı almaq perspektivi vəd edilir. Lakin Rusiyaya gəldikdən sonra vəziyyət kəskin şəkildə dəyişir. Qohumlarının və yeni əsgərlərin özlərinin sözlərinə görə, telefonları müsadirə olunur və tərcümə hüququ olmadan rus dilində hərbi müqavilələr imzalamağa məcbur edilirlər.
Minimal təlimdən sonra kişilər Ukraynadakı cəbhə bölgələrinə göndərilir. Perulular vəd edilmiş maaş əvəzinə qida və dərman çatışmazlığı, Rusiya komandanlığının sərt cəzaları və Ukrayna dronlarının davamlı hücumları ilə üzləşirlər. Qohumlarının sözlərinə görə, onların kişiləri sadəcə "top yemi" kimi istifadə olunur.
Peru Prokurorluğu artıq insan alveri ilə bağlı araşdırmaya başlayıb. İndiyə qədər yaxınları silahlı münaqişədə iştirak etmək üçün ölkəni tərk etməyə aldadılan ailələrdən rəsmi olaraq otuzdan çox şikayət qeydə alınıb.
Ailələri təmsil edən vəkillərin sözlərinə görə, ən azı 800 Peru vətəndaşı Rusiya ordusunda döyüşə bilər.
Peru Xarici İşlər Nazirliyi Moskvaya vətəndaşları haqqında məlumat və onların dərhal geri qayıtması tələbi ilə təxminən 250 rəsmi sorğu göndərib mLakin nazirlik etiraf edir ki, perulular Rusiya Müdafiə Nazirliyi ilə könüllü olaraq müqavilələr imzaladıqları üçün onların döyüş zonasından çıxarılmasını faktiki olaraq qeyri-mümkün ediblər.
Qeyd edək ki, Perudan əvvəl Hindistan, Banqladeş, Kolumbiya da Rusiyadan aldadılaraq cəbhə xəttinə göndərilən vətəndaşlarının geri qaytarılmasını tələb ediblər.
Musavat.com
