“Azərbaycanda qanunvericiliyə edilən yeni dəyişikliklərə əsasən, “hərbi texnikanın hərəkəti ilə bağlı məlumat yayan şəxsləri 8 ilədək azadlıqdan məhrumetmə cəzası gözləyir”. Bundan başqa, “mediada qoşunların və texnikanın hərəkəti barədə məlumat yaymaq qadağan olunub””.
Musavat.com xəbər verir ki, bu cümlələr Ermənistanın Azərbaycanşünas alimi Tatevik Ayrapetyanın sosial şəbəkədəki statusunda əks olunub.
Erməni ekspert buna görə Azərbaycanın yeni hərbi əməliyyatlara başlaya biləcəyi qənaətinə gəlib.
“Azərbaycan ermənilər və Ermənistanla sülh dövrünə hazırlaşmır, əksinə, adətən hərbi əməliyyatlar başlamazdan əvvəl atılan addımları həyata keçirir”, - deyə Ayrapetyan qeyd edib.
Qeyd edək ki, hərbi texnikaların hərəkəti ilə bağlı məlumatların yayılmasına məhdudiyyət qoyulması yalnız savaş dövrünə aid tədbir sayılmır. Görünür, Azərbaycanın bir hərbi maşınının səsi belə erməniləri qorxuda bilir. Necə deyərlər, qorxan gözə çöp düşər.
Musavat.com
