Azərbaycanın xalq artisti, ölkənin musiqi tarixində özünəməxsus yer tutan 88 yaşlı Zeynəb Xanlarova yenə səhnəyə qayıdır.
Musavat.com xəbər verir ki, sənətkar bu il də AzTV-nin ənənəvi Yeni il proqramının xüsusi qonağı olacaq. Rejissor Tərlan Tağıyev paylaşdığı görüntülərdə Xanlarovanın 31 dekabrda efirə veriləcək çıxışının çəkilişlərinin artıq tamamlandığını bildirib. Videodan görünür ki, Azərbaycan musiqisinin canlı əfsanəsi səhnəyə böyük enerji ilə çıxıb və tamaşaçıları yenidən təsirləndirməyə hazırdır.
Zeynəb Xanlarova – bir əsrə bərabər sənət yolu
1936-cı ildə Bakı şəhərində anadan olan Zeynəb Xanlarova Azərbaycan musiqisinə təkcə səsi ilə deyil, həm də milli vokal məktəbinin formalaşmasında oynadığı rolu ilə mühüm iz qoyub. O, Azərbaycan Dövlət Konservatoriyasını bitirib, uzun illər Musiqili Komediya Teatrında, Dövlət Filarmoniyasında fəaliyyət göstərib.
Repertuarında muğam (Şahnaz, Mahur, Qatar, Bayatı-Şiraz və s.), təsnif və Azərbaycan xalq mahnıları, Azərbaycan bəstəkarlarının (Qara Qarayev, Fikrət Əmirov, Tofiq Quliyev, Cahangir Cahangirov, Arif Məlikov, Emin Sabitoğlu, Ələkbər Tağıyev və b.) və şərq xalqlarının mahnıları geniş yer tutur. Azərbaycanın qadın xanəndələri arasında "Çahargah" muğamının ilk ifaçısıdır. O, həmçinin bir sıra mahnıların da müəllifidir.
Dünya səhnələrindən gələn alqışlar
Zeynəb Xanlarova uzun illər Azərbaycan mədəniyyətini dünya ölkələrində təmsil edib. Türkiyə, İran, Mərkəzi Asiya respublikaları, ABŞ, Fransa, Almaniya, Misir, Hindistan, Pakistan, hətta Afrika ölkələrində konsertlər verib. Türkiyədə “sarayda oxuyan xanəndə” kimi tanınıb, Böyük Teatr səhnəsində çıxış etməklə adını SSRİ dövrünün ən böyük sənətkarları sırasına yazdırıb.
1985-ci ildə Azərbaycan SSR Xalq artisti adına layiq görülüb, daha sonra isə Azərbaycanın Milli Məclisinin deputatı kimi uzun müddət ictimai-siyasi fəaliyyətlə də məşğul olub.
Əfsanənin dönüşü
Son illərdə səhnəyə nadir çıxış etsə də, Zeynəb Xanlarovanın hər dəfə ekrana qayıdışı böyük maraqla qarşılanır. Bu il də onun Yeni il şənliyində yer alması sənətsevərlərdə nostalji ovqat yaradıb. Xalq artistinin lentə alınmış bayram çıxışı dekabrın 31-də AzTV-də nümayiş olunacaq.
Sənətin, yaşın və irsin unudulmaz nümunəsi olan Xanlarova yenə milyonların qarşısında – milli musiqinin səsi kimi çıxış edəcək.
Xalidə Gəray
Musavat.com
