Rusiya prezidentinin köməkçisi Yuri Uşakov Rusiya və ABŞ liderləri arasında baş tutan telefon danışığının detalları ilə bağlı açıqlama verib.
Musavat.com xəbər verir ki, Uşakovun sözlərinə görə, Ukrayna Silahlı Qüvvələrinin Rusiya prezidenti Vladimir Putinin iqamətgahına hücum cəhdi ABŞ-ın Kiyevlə və Prezident Volodimir Zelenski ilə işləmək yanaşmalarına birbaşa təsir göstərəcək.
Uşakov bildirib ki, ABŞ prezidenti Donald Tramp bu hücum cəhdindən şoka düşüb və hadisəyə görə ciddi şəkildə hiddətlənib.
Rusiya liderinin köməkçisinin açıqladığı digər məqamlar da diqqət çəkir. Onun sözlərinə görə, Kiyevə müvəqqəti fasilə əldə etməyə çalışmaq tövsiyə olunmayıb, əksinə, kompleks və yekun razılaşmaya yönəlmək zərurəti vurğulanıb. Moskva Ukraynanın nizamlanma ilə bağlı təkliflərində öhdəliklərdən yayınmağa imkan verən geniş interpretasiya sahəsi gördüyünü də açıq şəkildə bəyan edib.
Uşakov qeyd edib ki, baş verənlər fonunda Rusiya ABŞ-la Ukrayna məsələsi üzrə daha əvvəl əldə edilmiş bir sıra razılaşmalar və danışıqlarda formalaşmış yanaşmalar üzrə mövqeyini yenidən nəzərdən keçirəcək.
Açıqlamada o da vurğulanıb ki, Tramp Putinlə söhbət zamanı Zelenskinin komandasının əldə etdiyi bəzi nəticələr barədə məlumat verib. Putin isə öz növbəsində Rusiyanın ABŞ-la sülhün tapılması istiqamətində sıx və səmərəli əməkdaşlığa hazır olduğunu bildirib.
Musavat.com
