ABŞ Prezidenti Donald Trampın İran aktivlərindən gəmilərə dəymiş ziyanın ödənilməsi üçün istifadə edilməsi barədə bəyanatı Tehranın kəskin etirazına səbəb olub.
Musavat.com xəbər verir ki, İran Xarici İşlər naziri Abbas Əraqçi "X" sosial şəbəkəsindəki hesabında bu addımı sərt şəkildə pisləyib və Vaşinqtonu beynəlxalq hüququ tapdalamaqda ittiham edib.
Nazir vurğulayıb ki, başqa bir dövlətin aktivlərinin bununla heç bir əlaqəsi olmayan gələcək iddiaları ödəmək üçün ələ keçirilməsi regionda eskalasiyanı alovlandıra biləcək ən təhlükəli presedentdir.
Əraqçi bu qərardan mənfəət götürmək istəyənlərə xəbərdarlıq edərək bildirib: "Bu cür vəsaitlərin əldə edilməsini bayram edənlər və ya onlardan qazanc əldə edənlər yadda saxlamalıdırlar ki, hökumətlər bu cür müsadirələri qanuniləşdirən kimi artıq heç kimin aktivləri təhlükəsizlikdə olmayacaq".
İran XİN rəhbəri bu addımın ardınca gələcək qlobal xaosun heç kim üçün xoş və ya dinc olmayacağını xüsusi qeyd edib.
Musavat.com
