Səudiyyə Ərəbistanı iyunun 2-də Saudi Aramco neft şirkətinin səhmlərinin növbəti hissəsinin yerləşdirilməsi prosesinə rəsmən başlamağa hazırlaşır.
Musavat.com xəbər verir ki, bu barədə Bloomberg mənbələrinə istinadən məlumat yayıb.
Məlumata görə, yerləşdiriləcək səhmlərin dəyəri 10 milyard dolları keçə bilər. Səhm yerləşdirilməsində iştirak üçün müraciətlərin qəbulunun gələn iyunun 6-da başa çatacağı gözlənilir. Mənbələrə görə, şirkətin qiymətli kağızları investorlara bazar qiymətindən 10 faiz endirimlə təklif oluna bilər. Lakin tələb yüksək olarsa, endirim daha az da ola bilər.
Agentlik mənbələri bildirirlər ki, Yaxın Şərq və Avropa investorları artıq sövdələşməyə maraq göstəriblər.
Bloomberg daha əvvəl bildirmişdi ki, Səudiyyə Ərəbistanı Citigroup Inc., Goldman Sachs Group Inc. və HSBC Holdings Plc Aramco səhmlərinin əlavə yerləşdirilməsinin təşkilinə cəlb etmək niyyətindədir. Agentliyin həmsöhbətləri qeyd edirlər ki, Səudiyyə Milli Bankı da sövdələşmədə iştirak edəcək.
Səudiyyə Ərəbistanı 2019-cu ildə Aramco-nun 30 milyard dollar dəyərində səhmlərini satışa çıxarıb. Şirkətin kapitallaşması 7,03 trilyon riyaldır (1,9 trilyon dollar). Aramco bazar dəyəri 2024-cü ilin əvvəlindən bəri 12 faiz ucuzlaşıb və onun səhmləri hal-hazırda 32 riyal olan IPO qiyməti ilə müqayisədə 29 riyaldan bir qədər yuxarıda ticarət edilir.
The Wall Street Journal qeyd edir ki, Səudiyyə Ərəbistanı hökuməti birbaşa Aramco səhmlərinin 82 faizindən çoxuna sahibdir və şirkətin daha 16 faizi suveren sərvət fondu İctimai İnvestisiya Fondu (PIF) tərəfindən idarə olunur. Daha əvvəl qəzet öz mənbələrinə istinadən xəbər vermişdi ki, Səudiyyə Ərəbistanı bu həftə Aramco-nun 10-20 milyard dollar dəyərində səhmlərini yerləşdirmə planlarını açıqlayacaq.
Musavat.com
