Azərbaycanın Böyük Britaniyadakı səfiri Elin Süleymanov APA-ya müsahibə verib. Həmin müsahibədə səfir bir sıra sensasion açıqlamalarla çıxış edib.
Diplomat deyib ki, hadisələr baş verən zaman Bakıda olub: “Səfirliyin əməkdaşlarının əksəriyyəti də həmin zaman məzuniyyətdə idilər. Həmin anda səfirlikdə yalnız 4 nəfər şəxs işləyirdi, hücumlar olan zaman isə 3 nəfər səfirlik binası daxilində idi, bunlardan biri də xanım əməkdaşımız olub. Mən də Bakıda idim. Bu hadisə baş verəndən sonra müvafiq görüşlər keçirən kimi dərhal Londona qayıtmışam”.
Elin Süleymanov səfirlik əməkdaşlarının sosial mediada qınanmasına da münasibət bildirib. “Bizim üç nəfər Azərbaycan diplomatımız səfirlik binasını tərk etmədən böyük bir kütləyə qarşı durub, səfirliyin içində olan vacib sənədləri qoruyub və bir saata yaxın səfirliyin içindən çıxmayıblar, təhlükəsizlik protokoluna uyğun davranıblar. Bu, böyük bir işdir. Onlar yalnız xüsusi polis əməliyyatı nəticəsində binadan çıxa biliblər. Əməkdaşlarımız böyük bir stress keçiriblər. Heç bir diplomat belə bir stresdən keçməməlidir. Onlar mülki şəxslərdir və mən əslində çox şadam ki, onlara heç bir xəsarət dəyməyib. Bir səfir kimi əsas prioritet odur ki, bizim vətəndaşlarımız, diplomatik heyətimiz heç bir xəsarət almasınlar, onlara ziyan dəyməsin. Hücum zamanı müvəqqəti işlər vəkili olan Rəşad Vahabzadənin prioriteti də o idi və onlar tam şəkildə qaydalara və təhlükəsizlik protokoluna uyğun davranıblar. Lakin bizim əməkdaşlarımızın belə bir hücuma məruz qalması qəbuledilməzdir. Mən özüm çox narahatam ki, belə bir hadisə baş verib. Bizim diplomat da xalqın övladıdır, vətəndaşıdır, ailə üzvüdür. Faktiki olaraq onlar az qala terror aktının qurbanları ola bilərdilər. Azərbaycanın bir diplomatı, o cümlədən bir xanımı girov düşsə, onlara nəsə olsaydı, bu, daha dərin bir problem ola bilərdi. Belə bir hücumu edənlər Azərbaycana qarşı düşmənçilik hissi olan şəxslərdir və əsas qınaq onlara yönəldilməlidir. Böyük təzyiq və stress altında qalan diplomatlarımız hədəfdə olmamalıdır, hədəfdə bu vəhşi hücumu keçirənlər olmalıdır”.
Səfir açıq şəkildə bildirib ki, Britaniya polisindən narazıdırlar və diplomatik missiyaların təhlükəsizliyi sahəsində Londonda boşluqlar var: “Bu narahatlığı istər Britaniya Xarici İşlər Nazirliyi, istərsə də London polisinə bildirmişik. Azərbaycan tərəfi də, bildiyiniz kimi, Bakıda Britaniyanın ölkəmizdəki səfirliyinin müvəqqəti işlər vəkilini nazirliyə çağırıb və bu hücumla bağlı iradlar bildirib”.
Səfirin müsahibəsində əsas sensasion məqam səfirliyə hücum edən 8 terroristlə bağlıdır. Belə məlum olur ki, İngiltərə polisi onları buraxa bilər, yaxud artıq buraxıb. Bu məqamla bağlı müxbirin sualı və ona cavaba diqqət edək:
- Saxlanılan 8 nəfərin istintaqını izləyirsinizmi? Onların sərbəst buraxılma ehtimalı varmı?
- Ola bilər. Britaniya tərəfinin öz qanun-qaydaları var. Mən bunu dəqiq deyə bilmərəm. Britaniya polisi kimisə yalnız 24 saat ərzində saxlaya bilər. Bu da onlardan asılıdır.
Belə aydın olur ki, Azərbaycan ərazisi sayılan Londondakı səfirliyimizi işğal edən terrorçular bəlkə də artıq azadlıqdadırlar və Azərbaycan tərəfi bununla bağlı hər hansı müqavimət göstərmək iqtidarında deyil...
Səfir “...bu hücumun motivləri nələrdir” sualına da maraqlı cavab verib: “Mən hiss edirəm ki, bu hücumun əsas məqsədlərindən biri Azərbaycan xalqının arasında bir qarşıdurma yaratmaq, bizi bir-birimizin əleyhinə çevirməkdir. Şükürlər olsun ki, Azərbaycan xalqı müdrik bir xalqdır. Hətta biz bundan sonra müşahidə etdik ki, Məhərrəmlikdə necə birlik göstərdik. Bu çox vacibdir. Hansısa fitnəçilərin oyununa uymamalıyıq. Bu fitnəçilər Azərbaycanın zəifləməsini istəyirlər, Prezident İlham Əliyevin apardığı siyasətlə Azərbaycanın güclənməsini istəmirlər. Bizim dövlətimizin dostları çox olsa da, kifayət qədər düşməni də var və kifayət qədər əleyhimizə çıxanlar var. Görünür ki, onlar bu fürsətdən istifadə edərək, Azərbaycanın özünə, Azərbaycan və Böyük Britaniya arasında olan güclü tərəfdaşlığa, güclü münasibətlərə zərbə vurmaq məqsədilə belə bir aksiya planlayıblar. Onu da əlavə etmək istərdim ki, İslam dininin əzizi, Əhli beytin övladı olan İmam Hüseynimizin adından belə bir kobud şəkildə istifadə etmək heç bir müsəlmana yaraşmır. İnsan heyrətə gəlir ki, eyni zamanda dinimizə qarşı, İmam Hüseynin xatirəsinə qarşı belə bir addımlar atırlar".
Səfir bildirib ki, Britaniya XİN Azərbaycandan üzr istəyib: “Ancaq biz üzrxahlıq yox, təhlükəsizlik təminatı və daha çox bu istintaq məsələsində Britaniya tərəfinin fəal şəkildə rol oynamasını, istintaqı lazımi şəkildə aparmasını istəyirik. Bu, çox vacib bir məsələdir”.
Elin Süleymanovun müsahibəsindən çıxan əsas sual - Azərbaycan səfirliyinə hücum edən 8 nəfər indi haradadır və Azərbaycan dövləti necə etməlidir ki, onlar cəzalarına çatdırılsınlar? Bununla bağlı nələr olunmalı, hansı cəhdlər göstərilməlidir?
Fazil Mustafa
Avropa Şurasının Parlament Assambleyasında Azərbaycan nümayəndə heyətinin üzvü, deputat Fazil Mustafa “Yeni Müsavat”a deyib ki, hücuma məruz qalan bina diplomatik immuniteti olan ərazidir: “Həmin şəxslər qanunsuz olaraq Azərbaycan ərazisinə daxil olublar. Necə ki, qanunsuz sərhədi keçmə cinayət məsuliyyəti yaradır, Londonda səfirliyə basqın edənlər də eyni cinayəti törədiblər. Buna görə də biz həmin şəxslərin məsuliyyətə cəlb edilmələrinin təmin olunması tələbi ilə çıxış etməliyik”.
Deputat deyir ki, baş verənlərlə bağlı İngiltərə XİN-in üzrxahlığını qəbul etdik: “Amma ortada konkret olaraq cinayət faktı var. İctimai qaydanın pozulması ilə müşayiət olunan binanın zəbti var. Zəbtə görə, bizim əraziyə qanunsuz daxil olmaya görə həmin şəxslərin Azərbaycanda mühakimə olunmasını tələb etməliyik. Beynəlxalq hüquq çərçivəsində həmin şəxslərin Azərbaycana verilməsini tələb edə bilərik”.
Deputat Azərbaycanın Londondakı səfirliyinə basqın etmiş şəxslərin ekstradisiyası ilə bağlı prosedurlara ləngimədən başlamaq lazım olduğunu vurğulayıb: “Faktlar toplanır, oradakı zorakılıq halları sənədləşdirilir və sübutlar London məhkəməsinə təqdim edilməklə tələb olunur ki, həmin şəxslərin məsuliyyətə cəlb edilməsi təmin edilsin. Eyni zamanda həmin şəxslərin Azərbaycanda mühakimə edilməsini də tələb edə bilərik”.
Deputat hesab edir ki, Londondakı səfirliyimizə basqın edən şəxslər sona qədər təqib edilməli və məsuliyyətə cəlb edilmələrinə nail olunmalıdır.
E.MƏMMƏDƏLİYEV,
“Yeni Müsavat”
