Rusiya Federasiyasının Milli İşlər üzrə Federal Agentliyi Mərkəzi Asiyadan olan miqrantlar üçün adaptasiya kursu keçir.
Musavat.com Rusiya mediasına istinadla xəbə verir ki, kurs 70 dəqiqəlik mühazirədən ibarətdir və Rusiyada ümumi ünsiyyət qaydalarını da özündə əks etdirir.
Federal agentlik rəhbərinin müavini Stanislav Bedkin bildirib ki, miqrantların sosial-mədəni adaptasiyası kursu beş regionda - Saxa Respublikasında (Yakutiya), Krasnodar və Perm ərazilərində, Kalininqrad və Moskva vilayətlərində sınaqdan keçirilib.
Mühazirə materialında Mərkəzi Asiyadan olan miqrantlara ölkədə ümumi ünsiyyət qaydaları, ictimai nəqliyyatda, küçədə, əks cinslə davranışın əsasları, habelə bayram günləri ilə tanışlıq təklif olunur.
“Dil və mədəniyyət biliyi Rusiyada yaşamaq və işləmək üçün əvəzsiz şərtdir. Rus dilini bilməniz işdə, nəqliyyatda, mağazada, klinikada, bankda, eləcə də polislə söhbətlərdə rahat ünsiyyət qurmağa imkan verəcək səviyyədə olmalıdır. Rusiya çoxmillətlidir, lakin hamı rus dilində danışır”, - sənəddə qeyd olunur.
Məsələn, mühazirə aydınlaşdırır ki, “qardaş” və ya “bacı” ünvanları qohum və ya yaxın tanış olmayan insanlarla ünsiyyət üçün uyğun deyil, ictimai nəqliyyatda bir-biri ilə yüksək səslə danışmaq, telefonla, videozənglə danışmaq, çirkli paltarda gəzmək qadağandır.
Bundan başqa, miqrantlara tövsiyə olunur ki, küçədə yoldan keçənlər haqqında öz ana dilində müzakirə aparmamalı, başqa insanların yanında öz ana dilində pıçıldaşmamalıdırlar. Həmçinin qeyd olunur ki, Rusiyada hər hansı dinə münasibət nümayiş etdirmək adət deyil, bunun üçün məscidlər, kilsələr, sinaqoqlar var və heyvan qurbanları da qəbuledilməzdir.
"Həmçinin, məsələn, Rusiyada toyda havaya atəş açmaq ənənəsi qəbuledilməzdir və məhkəmə prosesinə səbəb ola bilər", - deyə mühazirə qeyd edir.
Qarşı cinslə davranışın əsaslarına aid müddəada qeyd olunur ki, tanış olmayan qadınlara və kişilərə fiziki toxunmaq olmaz, bu cür hərəkətlər xoşunuza gələn qadının və ya kişinin diqqətini cəlb etməyə çalışarkən qısnama kimi qəbul edilə bilər.
Miqrantlar həmçinin Rusiyanın əsas bayramları və onları müşayiət edən adət-ənənələrlə tanış olmağa dəvət olunurlar. Mühazirəçi Yeni il, Milad, Vətənin Müdafiəçisi Günü, Beynəlxalq Qadınlar Günü, Qələbə Günü, Rusiya Günü və Milli Birlik Günü haqqında danışacaq.
Kurs zamanı miqrantlara qeyri-qanuni fəaliyyət nəticəsində tez qazanc əldə etmək üçün işləmək, qanunsuz sənədlər hazırlamaq, millətlərarası münaqişələrə girmək barədə xəbərdarlıq ediləcək.
“Mitinqlərə və nümayişlərə getməyin - adətən onların təşkilatçıları sizdən öz məqsədləri üçün istifadə etmək istəyirlər. Rusiyada hakimiyyətin icazəsi olmadan mitinq və nümayişlərin keçirilməsi qadağandır. İştirakçılar saxlanılır və cərimələnir, xarici vətəndaşlar isə Rusiyadan deportasiya oluna bilər”, - kurs materialında deyilir.
Musavat.com
