Ukraynanın pilotsuz təyyarələrinin hücumları nəticəsində neft emalı sahəsində yaranan çatışmazlıq və tədarükün kəsilməsi halında Rusiya benzin ehtiyacının bir qismini Qazaxıstandan ödəmək niyyətindədir.
Reutersin 3 sahə nümayəndəsinə istinadən verdiyi məlumata görə, Moskva Astanadan 100 min ton benzin ehtiyatı formalaşdırmasını xahiş edib.
Mənbələrdən biri bildirib ki, Qazaxıstanın ehtiyatlarının Rusiya üçün istifadəsinə dair razılaşma artıq razılaşdırılıb.
Rusiya və Qazaxıstanın energetika nazirlikləri hələlik Reuters-in şərh sorğusuna cavab verməyiblər.
Agentlik yazır ki, qonşu Belarus artıq Rusiyaya benzin təchizatında kömək etməyə razılaşıb.
Qeyd edək ki, ilin əvvəlindən Ukrayna pilotsuz təyyarələrinin Rusiya neft emalı zavodlarına və neft bazalarına hücumlarının intensivliyi artıb. Nəticədə Rusiyada benzin istehsalı azalıb, qiymətlər qalxmağa başlayıb. Hələlik hakimiyyət daxili yanacaq bazarlarında vəziyyətin sabit olduğunu, ehtiyatların kifayət qədər böyük olduğunu bildirir.
Bununla belə, Moskva kəskin yanacaq qıtlığının qarşısını almaq üçün martın 1-dən altı ay müddətinə benzin ixracına qadağa qoyub. Hələlik qadağa Moskvanın rəhbərlik etdiyi Avrasiya İqtisadi Birliyinə, o cümlədən Qazaxıstana, həmçinin hökumətlərarası saziş olan Monqolustan kimi bəzi ölkələrə şamil edilmir. Bununla belə, treyderlərin fikrincə, Rusiyada vəziyyət pisləşərsə, qadağanın əhatə dairəsi daha da genişləndirilə bilər.
Keçən həftə Uraldakı Orsk neft emalı zavodu Qazaxıstanı da əhatə edən geniş daşqın səbəbindən hasilatı dayandırıb.
Qazaxıstan da humanitar məqsədlər istisna olmaqla, ilin sonuna qədər yanacaq ixracını məhdudlaşdırıb.
Musavat.com
