Prezident 2013-cü ildə “YUKOS” neft şirkətinin keçmiş sahibi Mixail Xodorkovskini humanitar mülahizələrə əsaslanaraq əfv etmək qərarına gəlib və qərarından peşman deyil.
Musavat.com xarici mediaya istinadla xəbər verir ki, prezidentin mətbuat katibi Dmitri Peskov bu barədə suala cavab verərkən təfərrüata varıb: “O zaman cənab Xodorkovskidən xahiş var idi və doğrudan da prezident sırf insani və humanitar mülahizələrə əsaslanaraq belə bir qərar qəbul etdi. Xodorkovskinin vədlərinə gəlincə, onların hamısı kağız üzərində qaldı. Bu, qeyd etdiyiniz vətəndaşı kifayət qədər yaxşı xarakterizə edir”.
Xatırladaq ki, 20 dekabr 2013-cü ildə Vladimir Putin Mixail Xodorkovskinin əfv edilməsi haqqında fərman imzalayıb. Bundan əvvəl prezident Xodorkovskidən əfv xahişi aldığını bildirib. Eyni zamanda, Xodorkovskinin vəkilləri mediaya iş adamının ərizəsi barədə heç nə bilmədiklərini söyləyib.
“YUKOS” neft şirkətinin keçmiş sahibi Mixail Xodorkovski 2003-cü ilin oktyabrında həbs edilib. 2005-ci ildə dələduzluq və vergidən yayınma ittihamı ilə həbs cəzasına məhkum edilib. 2010-cu ildə iş adamı yeni hallara görə daha bir müddətə azadlıqdan məhrum edilib. Xodorkovskinin həbs müddəti 2014-cü ilin avqustunda bitməli idi.
Xodorkovski isə həbsdən çıxandan sonra xarici ölkəyə sığınıb və Putinin qatı əleyhdarına çevrilib.
Musavat.com
