“Bu gün Ermənistanda Qarabağla bağlı yenidən nəzərdən keçirilməli olan bir fərziyyə yayılır. Deyirlər ki, bu gün baş verənlər həm də beynəlxalq aləmin istəyidir, bu, bir məcburiyyətidir, bütün bunlar beynəlxalq birliyin təzyiqi ilə həyata keçirilir”.
Musavat.com erməni mediasına istinadən xəbər verir ki, bu sözlərin müəllifi Ermənistanın keçmiş xarici işlər naziri Vardan Oskanyandır.
“Bu fərziyyə tamamilə yenidən nəzərdən keçirilməli və ona yeni bir qavrayış gətirilməlidir. Bəli, beynəlxalq ictimaiyyət Qarabağ probleminin həllini istəyir, amma inanın ki, beynəlxalq ictimaiyyət onun necə həll olunacağı ilə o qədər də maraqlanmır. Qarşılarında açılmış yolla gedirlər. Problemi həll etməyin ən asan yolunu seçirlər. Bu gün Nikol Paşinyan beynəlxalq ictimaiyyətə Qarabağı Azərbaycana təslim etməyin ən asan yolunu göstərir. Təbii ki, beynəlxalq ictimaiyyət bu işdə Paşinyanı dəstəkləyəcək. İnanın ki, Ermənistan hakimiyyəti danışıqların mahiyyətinə yeni söz verdiyi anda beynəlxalq ictimaiyyətin mövqeyində kəskin dəyişiklik olacaq”, - deyə Oskanyan bildirib.
Onun iddiasına görə, əgər erməni tərəfi beynəlxalq ictimaiyyət qarşısında inandırıcı mülahizə tərtib etsə, o zaman danışıqların bütün xarakteri və məzmunu dəyişəcək.
Musavat.com
