“ABŞ Gürcüstan demokratiyasına xələl gətirən şəxslərə qarşı sanksiyalar tətbiq etməyə hazırdır”.
Musavat.com xəbər verir ki, bu bəyanat ABŞ Dövlət Departamentinin sözçüsü Metyu Miller tərəfindən mətbuat konfransında səslənib.
Millerin açıqlaması ABŞ dövlət katibi Antoni Blinkenin mayın 24-də “Gürcüstanda demokratiyanın pozulmasına görə məsuliyyət daşıyan və ya iştirak edən şəxslərə, eləcə də onların ailələrinə” sanksiyaların tətbiq ediləcəyi ilə bağlı bəyanatından sonra gəlib. O vaxtdan bəri hakim “Gürcü Arzusu”nun nümayəndələri bu məsələ ilə bağlı həm sanksiyaların yolverilməzliyi, həm də onların mümkünsüzlüyü barədə çoxlu bəyanatlar veriblər.
Üstəlik, Gürcüstan parlamentinin sədri Şalva Papuaşvili və Tiflis meri Kaxa Kaladze Qərb fondlarının terroru və zorakılığı maliyyələşdirməsi ilə bağlı ittihamlar səsləndiriblər.
Musavat.com
