Liviya Milli Neft Korporasiyası (NOC) ölkənin ən böyük yataqlarından biri olan Əl-Şərarada fors-major vəziyyətin aradan qaldırıldığını və neft hasilatının bərpa olunduğunu elan edib.
Bu barədə NOC-un “Facebook” sosial şəbəkəsində dərc olunmuş bəyanatında deyilir.
Yanvarın 7-dən etibarən Əl-Şararada iki həftə ərzində fors-major qüvvədə olub və neft hasilatı təxminən üç həftə ərzində həyata keçirilməyib.
Liviyanın "Liviya əl-Əhrar" telekanalı neft hasilatının bərpasının yerli sakinlərin yatağı tərk etməyə razılaşması sayəsində mümkün olduğunu bildirib. Yanvarın əvvəlində Əl-Şarara ərazisini bağlayan ölkənin cənub-qərbindəki Fezzan bölgəsinin sakinləri NOC-un rəhbəri Fərhat Benqdarla görüşdüklərini və onun etirazçıların irəli sürdüyü tələbləri yerinə yetirməyə razılaşdığını elan ediblər.
Xatırladaq ki, yanvarın 3-də Reuters agentliyi iki mənbəyə istinadən yatağın bilavasitə yaxınlığında yaşayan qəbilələrin nümayəndələrinin geniş etiraz aksiyalarına başladığını və bunun Əl-Şararada neft hasilatının tamamilə dayandırılmasına səbəb olduğuna dair məlumat yayıb.
Musavat.com
