Ukrayna Prezident Ofisinin müşaviri Mixaylo Podolyakın İrana edilən hücumlarla bağlı açıqlaması Tehranı “qəzəbləndirib”.
Musavat.com xəbər verir ki, İranın Ali Milli Təhlükəsizlik Şurasına yaxın olan “Nour News” xəbər agentliyi Kiyevin “Podolyakın qisasçı mövqeyinə görə ağır bədəl ödəyə biləcəyini” yazıb.
“Ukraynalı bir rəsminin bu açıqlaması və bu ölkənin İsfahandakı İran Müdafiə Nazirliyinin obyektində gecə saatlarında baş vermiş hücumda qisasçı iştirakının etirafı Kiyev üçün əhəmiyyətli hüquqi nəticələrə səbəb ola biləcək məsuliyyəti qəbul etməkdir”, - nəşr yazıb.
“Nour News” qeyd edir ki, bu məsələdə diqqət çəkən məqam bəzi İsrail mediası və fəallarının oxşar bəyanatlar səsləndirməsidir:
“Onlar əvvəlki hadisələrdə olduğu kimi, bir növ güc nümayişi göstərmək üçün İsrail rejimini bu hərəkətə görə günahlandırırlar. Podolyakın bəyanatları doğruluğundan asılı olmayaraq, təhlil olunacaq. Ukrayna rəsmisi və İsrail rejiminin yarırəsmi orqanlarının yanaşması Kiyev və Təl-Əvivin təhdidlə bağlı birgə strategiyasına işarə edir”.
Agentlik Ali Milli Təhlükəsizlik Şurasındakı müzakirələrə istinadən qeyd edib ki, “Kiyevin İran İslam Respublikasına qarşı düşmənçilik hərəkətlərində iştirak etdiyinə eyham vuran Ukrayna prezidentinin aparat rəhbərinin müşavirinin mövqeyinə inanmaq hələ də çətindir. Lakin Ukrayna hökuməti rəsmi olaraq hansısa bəraətverici izahat verməsə də, bu məsuliyyətsiz mövqelərin nəticələrini qəbul etməyə hazır olmalıdır”.
Xatırladaq ki, Ukrayna Prezident Ofisinin müşaviri Mixaylo Podolyak İrana edilən hücumlarla bağlı bunları bildirib: “İranda gecə saatlarında bir sıra strateji müəssisələrdə güclü partlayışlar baş verib. Müharibə qatillər və onların iştirakçıları üçün ağır qanunlar qoyur. Müharibənin məntiqi amansız və ölümcüldür. Və müəlliflərə və şəriklərinə sərt hesablar verir. Rusiya irimiqyaslı işğala başlayandan bəri sonsuz səfərbərliyə əl atıb, Moskvada raketdən müdafiə sistemi quraşdırıb, səngərlər qazıb, bomba sığınacaqları hazırlayıb. Bu arada İran Kremlə kömək etdikdən sonra “partlayıcı gecə” yaşadı. İranda partlayıcı gecə: dron və raket istehsalı, neft email zavodu. Ukrayna axı xəbərdarlıq etmişdi”.
