Alimlər Günəşin daxili quruluşunda indiyədək müşahidə olunmamış dəyişikliklər aşkar ediblər. Yeni araşdırmalar göstərir ki, Günəşin maqnit aktivliyi əvvəlki dövrlərlə müqayisədə fərqli davranmağa başlayıb və bu prosesin nəticələri 2030-cu illərdə daha aydın görünə bilər.
Musavat.com xəbər verir ki, məlumata görə, astronomlar ilk dəfə olaraq Günəşin daxilində yaranan səs dalğalarını və titrəyişləri ətraflı təhlil edərək ulduzun daxili fəaliyyətini öyrəniblər. Araşdırmalar Günəşin zəifləmədiyini, əksinə maqnit enerjisinin yerləşdiyi sahənin dəyişdiyini göstərib.
Yale Universitetinin astronomu Sarbani Basu bildirib ki, maqnit aktivliyi artıq Günəşin dərin qatlarında deyil, səthin təxminən 1000 kilometr altında yerləşən daha dayaz bir bölgədə cəmləşir. Bu isə ulduzun daxilində struktur yenidənqurmasının getdiyinə işarə edir.
Mütəxəssislərin fikrincə, maqnit sahələrinin səthə yaxınlaşması gələcəkdə Günəş püskürmələrinin xarakterini dəyişə bilər. Xüsusilə Günəşin maksimum aktivlik dövründə baş verən koronal kütlə atımları peyklərə, GPS sistemlərinə və elektrik şəbəkələrinə təsir göstərə biləcək güclü geomaqnit qasırğalarına səbəb ola bilər.
Alimlər hələlik bunun müvəqqəti proses, yoxsa Günəşin uzunmüddətli təkamülünün bir hissəsi olduğunu müəyyən edə bilməyiblər. Bu suala cavabın hazırda davam edən Günəş dövrünün başa çatacağı və yeni dövrün başlayacağı 2030-cu illərdə əldə olunacağı gözlənilir.
Araşdırma müəllifləri vurğulayırlar ki, hazırda insanlar üçün birbaşa təhlükə yoxdur. Lakin Günəşin daxili quruluşunda müşahidə edilən dəyişikliklərin kosmik hava şəraitinə və texnoloji infrastruktura mümkün təsirləri səbəbindən proses yaxından izlənilir.
Musavat.com
