Avropa İttifaqının Rusiya Federasiyasına qarşı tətbiq etdiyi məhdudiyyətlər fonunda ittifaq daxilində ciddi idarəetmə böhranı baş qaldırıb.
Musavat.com xəbər verir ki, "Financial Times" (FT) qəzetinin yaydığı şok məlumata görə, Avropa İttifaqı Rusiya əleyhinə sanksiyaların qəbul edilməsi mexanizminə köklü dəyişikliklər etməyi nəzərdən keçirir. Buna səbəb Yunanıstanın sonuncu sanksiyalar paketinin təsdiqlənməsini bilərəkdən gecikdirməsi və öz maraqlarını diktə etməsi olub. Rəsmi Afina Brüssellə apardığı gərgin mübarizə nəticəsində Rusiyanın maye qazının (LNG) daşınmasını həyata keçirən özünün nəhəng gəmiçilik şirkəti "Dynagas" üçün xüsusi istisna statusu qazanmağa nail olub və şirkətə Rusiya qazını daşımağa rəsmən icazə verilib.
Yunanıstanın bu qətiyyətli addımı Brüsseli ciddi şəkildə qəzəbləndirib. Məlumata görə, Avropa İttifaqı rəhbərliyi artıq sanksiyaların böyük paketlər şəklində deyil, tək-tək və ya kiçik bloklar halında təsdiqlənməsi variantını ciddi müzakirə edir. Bu yeni strategiyanın əsas məqsədi üzv dövlətlərin veto hüququndan istifadə edərək sanksiya siyasəti ilə birbaşa əlaqəsi olmayan məsələlərdə Brüsseldən şəxsi güzəştlər qoparmasının qarşısını tamamilə almaqdır. Ekspertlər hesab edirlər ki, bu addım birliyin daxilindəki demokratik qərar qəbul etmə prinsiplərinə ciddi zərbə vura bilər.
Musavat.com
