Donetsk vilayətinin Dobropolye istiqamətində Rusiya qüvvələrinin uzun fasilədən sonra həyata keçirdiyi iri zirehli hücum ağır itkilərlə nəticələnib. Hadisə Rusiya tərəfdarı hərbi blogerlər arasında da ciddi narazılıq yaradıb.
Musavat.com xəbər verir ki, iki tank və zirehli döyüş maşını koloniyası yüngül texnika ilə hərəkət edən piyadaların müşayiəti altında cəbhə xəttinə doğru irəliləyib. Ukrayna qüvvələri koloniyalara əsasən pilotsuz uçuş aparatları ilə zərbələr endirib.
Ukraynanın “Azov” bölməsinin məlumatına görə, Rusiya qüvvələri hücum zamanı 13 zirehli texnika, 2 reaktiv yaylım atəşi sistemi və 47 yüngül texnika itirib. Həmçinin 123 rusiyalı hərbçinin öldürüldüyü bildirilir. Bu rəqəmlər müstəqil şəkildə təsdiqlənməyib.
Hücumun uğursuzluğunu Rusiya tərəfdarı hərbi mənbələr də etiraf edirlər.
Müasir döyüş meydanında dronların geniş tətbiqi səbəbindən hər iki tərəf böyük zirehli koloniyalardan əvvəlki illərlə müqayisədə daha az istifadə edir. Tank və digər ağır texnikanın cəbhə xəttinə böyük qruplarla çıxarılması onları dronlar üçün asan hədəfə çevirir.
Diqqətçəkən məqamlardan biri hücumda iştirak edən bəzi Rusiya tanklarının “Arena-M” aktiv müdafiə sistemi ilə təchiz edilməsi olub. Bu sistem yaxınlaşan dron və digər təhlükələri məhv etmək üçün hazırlanıb.
Hərbi analitik Yan Matveyevin sözlərinə görə, görünür, Rusiya komandanlığı sistemin artıq geniş döyüş şəraitində istifadəyə hazır olduğunu düşünüb. Lakin nəticə gözlənilən kimi olmayıb. Onun sözlərinə görə, “Arena-M” bəzi dronları məhv edə bilsə də, koloniyanın darmadağın edilməsinin qarşısını ala bilməyib.
Rusiya tərəfdarı “Voyennoye obozreniye” portalı da baş verənləri “ictimai və alçaldıcı fiasko” adlandırıb. Mənbə ehtimal edir ki, bəzi tank ekipajları sistemi işə salmamış və ya onun məhdud sursat ehtiyatı tükənmiş ola bilər.
Ən sərt reaksiyalar isə Rusiya tərəfdarı Z-blogerlərdən gəlib.
Onlardan biri komandanlığın nəyə ümid etdiyini soruşaraq istehza ilə yazıb: “Bizim adamlarımızın onların dronlarından çox olduğuna?”
Digər hərbi blogerlər isə müharibənin beşinci ilində böyük koloniyalarla hücum cəhdinin anlaşılmaz olduğunu bildiriblər.
“Beşinci ildə generallar dədələrinin vəsiyyəti ilə “dahi” tank yarma əməliyyatı təşkil etdilər. Nəticə gözlənilən oldu”, – deyə Rusiya tərəfdarı mənbələrdən biri komandanlığı sərt şəkildə tənqid edib.
Beləliklə, Dobropolye istiqamətindəki uğursuz hücum təkcə texnika və canlı qüvvə itkisi ilə deyil, Rusiya hərbi dairələrində komandanlığın taktikasına qarşı yeni tənqid dalğası ilə də nəticələnib.
Musavat.com
