Böyük Britaniya parlamenti “TikTok”a hökumət cihazlarında və daxili şəbəkədə məhdudiyyət qoymaq qərarına gəlib.
“Report” xəbər verir ki, bu barədə “The Guardian” məlumat yayıb.
Qeyd olunub ki, qərar “parlament üçün əsas prioritet” olan informasiya təhlükəsizliyi səbəbi ilə qəbul edilib.
Parlamentdəki mənbə “The Guardian”a bildirib ki, sosial şəbəkədən istifadəni qadağan etmək qərarı “Böyük Britaniya hökuməti ilə müəyyən sosial şəbəkələr və proqramlar tərəfindən izləmə və məxfilik pozulmalarının potensial riskləri ilə bağlı müzakirələrdən sonra verilib”.
Böyük Britaniya hökuməti “TikTok”a qarşı sərt addımlar atan ilk ölkə deyil. Bundan əvvəl Şotlandiyada, Yeni Zelandiyada və ABŞ-nin bir sıra ştatlarında hökumət rəsmilərinə bu sosial şəbəkədən istifadə qadağan edilib.
ABŞ-ın dövlət katibi Entoni Blinken də deyib ki, Ağ Ev “TikTok” sosial şəbəkəsini ölkənin milli təhlükəsizliyinə təhdid hesab edir.
APA-nın məlumatına görə, Nümayəndələr Palatasının Xarici Əlaqələr Komitəsinin dinləmələrində çıxışı zamanı o, “TikTok”un “bu və ya digər şəkildə bitməli olduğunu” vurğulayıb.
P.S. Qeyd edək ki, son aylarda bir çox ölkələrdə sözügedən sosial şəbəkənin mənfi cəhətləri barədə söz-sphbətlər böyüyüb və onun qadağan edilməsi barədə müzakirələr gedir. Görək, həmin ölkələr Britaniyanın təcrübəsindən örnək götürəcəkmi?
Musavat.com
