Böyük Britaniya Rusiyanın hərbi təchizat zəncirlərində iştirak edən və onun Ukraynaya müdaxiləsinə dəstək verən müxtəlif ölkələrdən olan şəxslərə və qruplara qarşı 46 yeni sanksiya tətbiq edib.
Britaniya Xarici İşlər Nazirliyinin məlumatına görə, sanksiya tətbiq edilən hüquqi şəxslər arasında Çin, Türkiyə, Serbiya və Özbəkistanda fəaliyyət göstərən şirkətlər var. Britaniya Kiçik xarici işlər katibi Anne-Mari Trevelyan deyib: “Biz Putinə təzyiqi artırmağa və harada olurlarsa olsunlar, Rusiyaya qadağan olunmuş mal və texnologiya tədarük edən üçüncü tərəflərə qarşı sərt tədbirlər görməyə davam edəcəyik”.
Britaniya XİN pilotsuz uçan aparatların və raket hissələrinin inkişafı və istehsalı və elektron komponentlərin idxalı ilə əlaqəli 31 şəxs və təşkilata, həmçinin Rusiya neftinin ticarəti ilə məşğul olduğuna görə Birləşmiş Ərəb Əmirliklərinin 4 şirkətinə qarşı sanksiya tətbiq etdiyini açıqlayıb.
Xarici İşlər Nazirliyi Minskin Rusiyanın hərbi səylərini dəstəkləmək üçün istifadə etdiyi hərbi texnologiyaları istehsal edən Belarus müdafiə təşkilatına qarşı da sanksiyalar tətbiq etdiyini bildirib.
Musavat.com
