“Düşünürəm ki, Azərbaycanla Ermənistan arasında sülh müqaviləsinin imzalanmasında bir sıra əngəllər var. Bu əngəllərin mənbəyi, kökü isə Moskva yox, Qərbdir. Onlar Ermənistanı Rusiyanın himayəsindən çıxarmaq istəyirlər. Ona görə yox ki, Azərbaycanla Ermənistan arasında sülh bərqərar olsun, ona görə ki, Ermənistanı Azərbaycana qarşı daha da doldursunlar”.
Bu fikirləri Bizim.Media-ya açıqlamasında Rusiya Prezidenti yanında Beynəlxalq Əlaqələr Şurasının Rəyasət Heyətinin üzvü Boqdan Bezpalko deyib.
“Fransa Qafqazda münaqişə yaratmağı planlaşdırır”
Qərbin, Fransanın, Böyük Britaniyanın Qafqaz maraqlarını şərh edən analitik hesab edir ki, hazırda əsas məqsəd Ermənistanı Rusiyanın himayəsindən çıxarıb, Fransanın himayəsinə təslim etməkdir:
“Bütün bunlar reallaşarsa, Ermənistanın əsas tərəfdaşı Rusiya yox, Fransa olacaq. Hazırda bir sıra Qərb ölkələrinin, xüsusilə də Fransanın əsas məqsədi Qafqazı “partlatmaqdır”. Bu zaman nəinki regonda olan ölkələr zərər görəcək, həmçinin bu regionun əsas güclərindən biri olan Rusiya, İran, o cümlədən Çin böyük zərbələr alacaq.
Əgər belə bir şey baş tutarsa, bu zaman onların böyük enerji resurslarına malik olan Xəzər dənizinə girişləri də asanlaşacaq. Həmçinin bu, hərbçilərin də regiona daxil olmasını asanlaşdıracaq”.
