Dekabrın 21-də Bakıda keçirilən Heydər Əliyevin və Türkiyə Cümhuriyyətinin 100 illiyinə həsr edilmiş Azərbaycan-Türkiyə İnvestisiya Forumunda Azərbaycanla Türkiyə arasında bir sıra sənədlər imzalanıb.
Musavat.com bildirir ki, imzalanan sənədlərdən biri - Azərbaycanda İxracın və İnvestisiyaların Təşviqi Agentliyi (AZPROMO) ilə Türkiyə və Azərbaycan İş Adamları və Sənayeçiləri İctimai Birliyi (TÜİB) arasında Fəaliyyət Planıdır.
AZPROMO və TÜİB arasında imzalanmış 2024-cü il üçün Fəaliyyət Planında ölkələrimiz arasında ticarət və investisiya həcmini artırmaq, iki ölkə arasında əməkdaşlığı gücləndirmək və qarşılıqlı investisiya imkanlarını dəstəkləmək və davamlı inkişaf məqsədlərinə uyğun birgə layihələri təşviq etmək nəzərdə tutulub.
İmzalanan digər sənəd isə "DO-DEM"MMC ilə "Multipak Ambalaj"şirkəti arasında müqavilədir. İmzalanmış müqaviləyə əsasən, Azərbaycanda kağız əsaslı, təbiətə zərər verməyən və qida təhlükəsizliyinə əsaslanan qabların istehsalı ilə üzrə fabrik tikiləcək.
Bundan başqa, Azərbaycanın "Diplomat LTD" şirkəti ilə Türkiyənin "Doğru Holding"i arasında da bir sənəd imzalanıb. İmzalanmış bu sənədə əsasən, Azərbaycanda hotel tikiləcək.
Xalidə Gəray,
Fotolar müəllifindir
Musavat.com
