Avropa İttifaqının 12-ci sanksiyalar paketi çərçivəsində Rusiyadan almaz idxalına qoyulan qadağa zərgərlik məmulatlarına da şamil ediləcək.
Musavat.com xəbər verir ki, bu barədə “EU Observer” mənbələrə istinadən yazır.
Aİ-nin daxili sənədinə istinadən verilən məlumata görə, Avropa İttifaqı yeni anti-Rusiya sanksiyalar paketinə “çeşidlənməmiş almazların, eləcə də əksər qeyri-sənaye və süni almazların idxalına qadağa” daxil etməyi təklif edir.
Məhdudiyyətlər siyahısına həmçinin istənilən “zərgərlik məmulatları”, “təbii və mədəni mirvarilərdən hazırlanmış məmulatlar” və tərkibində qızıl və gümüş, o cümlədən brilyant olan məhsullar daxil ediləcək.
Xüsusilə, bu, qol saatlarına aiddir:
“Qadağa Rusiyada hasil edilən brilyantlara, Rusiyadan ixrac edilən almazlara, Rusiya ərazisindən tranzit edilən brilyantlara və üçüncü ölkələrdə emal olunmuş rus almazlarına şamil edilir”.
Bu təkliflər təsdiq olunarsa, 2024-cü il yanvarın 1-dən Rusiyadan almazların idxalına qadağa tətbiq olunacaq. Rusiyadan üçüncü ölkələrdə emal olunmuş brilyantlara məhdudiyyətlərin 2024-cü il sentyabrın 1-dən tətbiq edilməsi planlaşdırılır, çünki ilk növbədə bu malların mənşəyini izləmək üçün yeni mexanizm tətbiq edilməlidir.
Musavat.com
