Avropa İttifaqı üzv dövlətlərə blokun sanksiyalarından yayınmağa çalışan gəmilərdən müsadirə edilmiş Rusiya neftini satmağa icazə verəcək.
Musavat.com Euractiv-ə istinadən xəbər verir ki, Avropa Komissiyasının rəsmiləri Aİ diplomatları arasında razılaşmadan qısa müddət sonra təsdiqləyiblər ki, Moskvaya qarşı yeni sanksiyalar paketinə Rusiyanın "kölgə donanmasına" məxsus gəmilərdən müsadirə edilmiş xam neft və digər malları satmaq imkanı daxildir.
Aİ rəsmisi bildirib ki, "çox vacib bir müddəa" üzv dövlətlərə tutulan tankerlərdə kölgə donanması tərəfindən daşınan malları müsadirə etməyə imkan verəcək.
Bu cür müsadirələr getdikcə daha çox yayılır. Rəsmi şəxsin sözlərinə görə, əsas sual yüklə nə etmək idi - "bu, çox dəyərli bir maldır". Neft Rusiyanın ən gəlirli ixracatı olsa da, müsadirə edilmiş taxıl məhsulları da oxşar şəkildə satıla bilərdi.
Qeyd edək ki, mart ayında Belçika Şimal dənizində Rusiyanın kölgə donanmasına məxsus olduğu şübhəli bilinən bir tankeri ələ keçirib. Onun tutumu təxminən 330.000 barel neft idi və cari qiymətlərlə dəyəri 26 milyon dollara qədərdi.
Ötən ay Fransa Murmanskda yükləndikdən qısa müddət sonra təxminən 48 milyon dollar dəyərində 600.000 barel neft tutumuna malik başqa bir oxşar gəmini ələ keçirib.
Moskva bu cür fəaliyyətləri "piratlıq" adlandırır və "bütün zəruri vasitələrlə" cavab verəcəyi ilə hədələyir. Aİ-nin baş diplomatı Kaja Kallas həmçinin bildirib ki, Rusiya ilə əlaqəli MV South Star gəmisi 20 iyulda Aralıq dənizində Avropa dəniz təhlükəsizliyi zabitləri tərəfindən "bayraq yoxlaması" üçün saxlanıb: "Hər bir qanunsuz səyahət Rusiyanın hərbi maşınını dəstəkləməyə kömək edir. Biz sanksiyalarımızı dənizdəki hərəkətlərlə dəstəkləyirik".
Musavat.com
