Ali Məhkəmədə hakim İlkin Rəcəbovun sədrliyi ilə Vüsal Axundovun barəsindəki qərardan verilən kassasiya şikayətinə baxılıb. O, hədə-qorxu ilə şantaj etməkdə təqsirləndirilir.
Musavat.com xəbər verir ki, ittihama görə, Vüsal Axundov hüquq-mühafizə orqanlarının birində işləyən əmisi oğlu Emin Axundovu kriminal aləmdə “Lotu Quli” kimi tanınan mərhum Nadir Səlifovun adından şantaj edib.
Emin Axundovun dediyinə görə, bu şantaj nəticəsində 12 milyon manatlıq pul və əmlakı əlindən alınıb. Onun şikayəti əsasında öz əmisi oğlu Vüsal Axundov cinayət məsuliyyətinə cəlb edilib.
Bakı Ağır Cinayətlər Məhkəməsində hökm çıxarılıb və Cinayət Məcəlləsinin 182.4-cü (xüsusilə külli miqdarda əmlak əldə etmək məqsədilə hədə-qorxu ilə tələbetmə) maddəsi ilə təqsirli bilinən Vüsal Axundov 14 il azadlıqdan məhrum edilib. Həbsindən öncə ədliyyə sistemində çalışan Vüsal Axundov isə özünü təqsirli bilmir, ittihamı qəbul etmir. Hökmdən öncə son sözündə deyib ki, əmisi oğlunun “Lotu Quli”nin tələbiylə pul və əmlaklarını verməsinin ona aidiyyəti yoxdur.
O, məhkəmədən bəraət istəyib. Zərərçəkmiş qismində tanınan Emin Axundov məhkəməyə gəlməyib, onu vəkili təmsil edib. O, istintaqa ifadəsində deyib ki, əmisi oğlu onun qazancını, sahib olduğu pul və əmlakı bilirdi. Ona görə də “Lotu Quli”nin adından hədə-qorxu gələrək pulunu və əmlakını ələ keçirib. Lakin o, hansı səbəblə şantaj olunduğunu, ondan niyə pul tələb edildiyini açıqlamayıb.
Emin Axundov bildirib ki, əmisi oğlu Vüsal özünü “Lotu Quli” ilə aralarında vasitəçilik edirmiş kimi göstərib. Zərərçəkmiş iddia edir ki, öncə 700 min dollar pul verib. Sonra 12 sot torpaq sahəsində tikilmiş villası, Çexiyada mülkü və başqa əmlakları əlindən alınıb: “Pulu verirdim Vüsala, deyirdi ki, çatdırdım...”
Zərərçəkmişin sözlərinə görə, sonda tələbləri yerinə yetirə bilmədiyini görüb bir dostundan kömək istəyib. Şikar adlı dostu vasitəsilə Səlifovla əlaqə saxlayıb:
“O isə bildirib ki, heç kimdən heç nə istəməyib, onun adından istifadə edirlər”.
Təqsirləndirilən Vüsal Axundov isə əmisi oğlunun onu şərlədiyini deyir:
“Niyə Quli ölənə qədər heç yerə şikayət etmirdi, öləndən dərhal sonra şikayət elədi? Əgər doğru olsaydı, elə sağlığında şikayət edərdi. Özü də əməliyyatçı olub, kor-koranə kiməsə pul verməzdi”.
Ali Məhkəmə Vüsal Axundovun təqdim etdiyi kassasiya şikayətinin əsassız olması qənaətinə gəlib və şikayət təmin edilməyib.
E.MƏMMƏDƏLİYEV,
Musavat.com
