ABŞ-nin Polşada yerləşdirə biləcəyi nüvə silahları Rusiya Federasiyası ilə NATO arasında birbaşa toqquşma olacağı təqdirdə Rusiyanın hədəfinə çevriləcək.
Musavat.com Rusiya mediasına istinadla xəbər verir ki, bunu Rusiya Xarici İşlər Nazirliyinin rəsmi nümayəndəsi Mariya Zaxarova deyib.
Onun sözlərinə görə, Varşava heç vaxt "ABŞ-ın Avropada yerləşdirilmiş nüvə silahlarından daha möhkəm yapışmaq" baxımından öz ambisiyalarını gizlətməyib.
"Görünür, Varşava manyakcasına Rusiya Baş Qərargahındakı hərbi strateqlərin diqqətini daha da cəlb etməyə çalışır", - diplomat brifinq zamanı qeyd edib.
M.Zaxarova deyib ki, Amerikanın nüvə silahları Polşada peyda olarsa, bu obyektlər dərhal NATO ilə birbaşa toqquşma zamanı məhv edilmək üçün qanuni hədəflər siyahısında görünəcək.
Bundan əvvəl Polşa prezidenti Anjey Duda ölkəsinin öz ərazisində ABŞ nüvə silahlarını yerləşdirməyə hazır olduğunu bəyan edib. Daha sonra o, bununla bağlı hələlik heç bir qərarın verilmədiyini bildirib.
Kreml qeyd edib ki, Rusiya hərbçiləri vəziyyəti təhlil edəcək və ölkənin təhlükəsizliyini təmin etmək üçün hər şeyi edəcək.
Musavat.com
