Aktyor Elcan Rəsulov bir neçə gündür aldığı qızıl hədiyyəsi ilə gündəm olan ibtidai sinif müəllimi Yaqut Ağamalıyevanın tanınmış ssenarist Faiq Ağamalıyevin anası olduğunu bildirib.
Musavat.com xəbər verir ki, aktyor bu barədə özünün "Facebook" hesabında yazıb:
"Çox təəssüf edirəm, bəzən cəmiyyət bilib-bilmədən kimisə və ya nəyisə qınayır. Türklər demişkən, çox önyarqılı olmuşuq. O qulağına sırğa taxılan müəllimin videosunu gördüm. Bəlkə də bu yaşınadək müəllimin qulağına taxılan ilk qızıl sırğadır. Bəlkə də, elə dörd il ərzində valideynlər heç vaxt qulağında sırğa, barmağında üzük olmayan müəllimin bu vəziyyətini görüb, öz aralarında danışıblar ki, ona elə bir dəstə gül qiymətinə qızıl sırğa alıb qulağına taxsaq, dünyanı vermiş olarıq".
Faiqi 20 ilə yaxındır tanıyıram. Qış aylarında, yəni serial mövsümündə seriallarda senarist işləyir, yay da gələn kimi başını götürüb gedir bölgələrdəki istirahət mərkəzlərində animator işləyib ailəsini dolandırmağa çalışır".
Qeyd edək ki, Faiq Ağamalıyev bir neçə televiziya serialında ssenarist kimi fəaliyyət göstərib.
Musavat.com
