Ermənistanın baş naziri Nikol Paşinyan “Qarabağ zonasında zorakılığın növbəti yüksəlişinin qarşısını almaq üçün” Azərbaycan Prezidenti İlham Əliyevə “təcili” danışıqlar aparmağı təklif edib.
Paşinyan bu təklifi Fransa prezidenti Emmanuel Makron, Almaniya kansleri Olaf Şolts və İran prezidenti İbrahim Rəisi ilə telefon danışığı zamanı səsləndirib. O, Ermənistan-Azərbaycan sərhədində və Qarabağ “təmas xəttində” gərginliyin artması fonunda adıçəkilən liderlərə zəng edib. Bu barədə “Azadlıq” radiosunun erməni bölümünün ingilisdilli saytı xəbər yayıb.
Ermənistan hökuməti bildirir ki, Azərbaycan növbəti irimiqyaslı hərbi hücuma hazırlıq məqsədilə oraya qoşun yığır. Paşinyan cümə axşamı beynəlxalq ictimaiyyəti Bakının iddia edilən planlarının qarşısını almaq üçün “çox ciddi tədbirlər” görməyə çağırıb.
“Baş nazir Paşinyan Azərbaycan Prezidenti ilə gərginliyin azaldılması istiqamətində təcili müzakirələr aparmağa hazır olduğunu bildirib”, - hökumətin Makronla görüşünə dair cümə günü axşam saatlarında baş tutan bəyanatda deyilir.
Paşinyan həmçinin Makronun iştirakı ilə Əliyevlə 2022-ci ilin oktyabr və 2023-cü ilin may aylarında keçirdiyi görüşlərdə Azərbaycanın ərazi bütövlüyünü tanıdığını bir daha təsdiqləyib.
Nikol Paşinyanın ofisi onun Şolts və Rəisi ilə ayrı-ayrılıqda söhbətinin mətnini də yayıb. Hər 3 mətn son dərəcə oxşardır. Fransa və Almaniya liderləri Paşinyana “bölgədə sülh və sabitliyin bərqərar edilməsi üçün səylərini” davam etdirəcəklərinə söz veriblər.
Elbəyi HƏSƏNLİ, SÜRİX 
