Bu gün Xalq artisti Səkinə İsmayılovanın doğum günüdür. Muğam ifaçısı 70 yaşını qeyd edir.
Musavat.com sənətçinin özəl günü ilə bağlı təəssüratlarını öyrənib:
-Səkinə xanım, necəsiniz? Doğum gününüzü necə qeyd edirsiniz?
- Əlayam. Doğum günümü ailəmlə birlikdə keçirəcəyəm. Hamımız bir süfrə arxasında əyləşəcəyik. Mən heç vaxt təmtarağı sevməmişəm. Ailə ilə birgə olmaq mənə o qədər xoşdur ki... Onların yanında xoşbəxtəm.
-Sizi xoşbəxt insan hesab etmək olar?
- Əlbəttə. Sənətimi sevirəm. İnsanlar məni sevir. Bütün bunlar mənə xoşbəxt insan olduğumu deməyə imkan verir. Daimi xoşbəxtlik isə yoxdur. Bu sadəcə anlardan ibarət olur.
-Kişilər haqqında deyirlər: “Yaş kişinin var-dövlətidir”. Bəs qadınlar üçün yaş nə deməkdir?
-Yaş mənim üçün ömürdür, həyatdır. Baxır ömrü necə keçirmisən. Mən həyatım və ömrümlə fəxr edirəm.
-Adətən insanlar müəyyən yaşdan sonra keçmişin xiffətini çəkir. Bəs siz?
-Heç vaxt keçmişin həsrətini çəkməmişəm (gülür). Allaha bağlı insanam. O, nə günlər, aylar yazıbsa, hamısı gözəldir və qismətimizdir. Nəyin xiffətini çəkim? Həyat budur: bir gün gülürsən, bir gün qəmlənirsən.
-Ömrü haqq-hesab edəndə ən çox hansı günləri xatırlayırsınız?
-Ömrümü tərəziyə qoymuram. Tərəziyə qoyulası mənim sənətimdir, bu da xalqa məlumdur.
-Özəl gününüzdə kim zəng etsə və ya sizi gəlib təbrik etsə, ürəyinizə yağ-bal kimi yayılar?
-Bu gün məni təbrik etməyən qalmadı. (gülür).
-Bəs özünüz özünüzü təbrik etdiniz?
-Bu gün sübhdən durdum, imsakı açdım və bütün zənglərə cavab verməyə başladım. Özümün özümlə danışmağa heç vaxtım qalmadı.
Şahanə Rəhimli
Musavat.com
