"Paris Saint-Germain" futbol klubunun rəhbərliyi komandanın hücumçusu Neymarın davranışından narazıdır. Braziliyalı qolçu parislilərin çempionluq matçını buraxıb.
Musavat.com xarici mediaya istinadla xəbər verir ki, Neymar PSJ-nin çempionluq qazandığı oyuna komanda ilə getməmək qərarına gəlib. Bunun əvəzinə o, Monakoda Formula 1 nümayişi tədbirində iştirak edib.
Paris komandasının bossları braziliyalının bu hərəkətinə mənfi reaksiya verib və bunu "təxribat" hesab ediblər.
Bundan əlavə, Neymar PSJ-nin Liqa 1 çempionluğu matçında Monte Karloda keçirilən poker turnirində görüntülənib.
Daha əvvəl hücumçunun yay transfer pəncərəsində PSJ-dən ayrılma ehtimalının yüksək olduğu bildirilirdi. Onun parislilərlə müqaviləsi 2025-ci ilə qədərdir.
Neymar 2017-ci ilin avqustundan PSJ-də çıxış edir. 2022/23 mövsümündə hücumçu komandanın heyətində bütün yarışlarda 29 matçda 18 qol vurub və 17 məhsuldar ötürmə edib. Hazırda ayaq biləyindən zədəsini sağaldır.
Musavat.com
