Erməni revanşistlərinin növbəti təxribatı - bu dəfə Kəlbəcər istiqamətində - çox genişmiqyaslı və dramatik nəticələrə səbəb ola bilər. Əvvəlcə qeyd etmək lazımdır ki, sərhəddə kifayət qədər uzun müddət sakitlik hökm sürürdü.
Bakı və İrəvan ən çətin sahələrdən biri olan Qazax istiqamətində sərhədlərin delimitasiyası və demarkasiyası məsələsində irəliləyiş əldə edə bilmişdi. Belə bir şəraitdə mövqelərimizin atəşə tutulması uzaqgedən məqsədlərə malik təxribatdır. Üstəlik, Ermənistan son bir il ərzində ilk dəfə ağır silahdan istifadə edib.
Xatırladaq ki, iyulun 20-si saat 22.10 radələrində Ermənistan silahlı qüvvələrinin bölmələri Basarkeçər rayonunun İstisu yaşayış məntəqəsi istiqamətində yerləşən mövqelərindən Azərbaycan Ordusunun Kəlbəcər rayonunun İstisu yaşayış məntəqəsi istiqamətində yerləşən mövqelərini iriçaplı silahlardan atəşə tutub.
Bölmələrimiz tərəfindən qeyd olunan istiqamətdə adekvat cavab tədbirləri görülüb.
Amma ən vacibi və ən təhlükəlisi başqa məqamdır.
Azərbaycan mövqelərinə atəş ABŞ, Fransa və Avropa İttifaqını təmsil edən hərbi müşavirlərin iştirakı, daha doğrusu, ortaq iştirakı ilə həyata keçirilib. Beləliklə, Ermənistana yeni təhvil verilən ölümcül silahların döyüş şəraitində sınaqdan keçirilməsi qərara alınıb. Həmçinin xarici kəşfiyyat vasitəsilə Azərbaycan ordusunun atəşə necə reaksiya verəcəyini izləmək məqsədi də var idi.
Azərbaycanlı hərbçilərə qarşı real döyüş şəraitində ABŞ və Fransa hərbi qüvvələri tərəfindən Ermənistan Silahlı Qüvvələrinə verilən snayper tüfənglərinin və Avropa İttifaqı missiyasına daxil olan kəşfiyyat zabitlərinin istifadə edildiyi barədə məlumat var.
Əlverişli atəş mövqeyinin seçilməsi, atəşdən sonra geri çəkilmə, "aldatma" nöqtələrinin, yəni saxta atəş nöqtələrinin qurulması, atəşdən dərhal sonra rabitə vasitələri və digər vasitələrlə kəşfiyyat aparılması və digər bir çox vəzifələr - bütün bunlar artıq Qərb və NATO ölkələrinin hərbi standartlarına uyğun olaraq həyata keçirilib.//Milli.Az
